1 Tsî ǃaruǀî ge ge tani ǁoa, o khom ge sikhoma ǀguri Atenes ǃnâ hâsa ge mîǀgui. 2 Tsî khom ge Timoteub sikhom di ǃgâsa tsî sîsenǁare-aob Elob dib, ǃGâiǂhôas Xristub* dis ǃnâba ge sî, ǁîb nî sado ǀgaiǀgaiǃnâ tsî ǁnamase sadu ǂgoms ǃaroma. 3 ǀGui-i âdu tsîn nē ǃgôaǃgondi xa ǃaromahe hâse ǁnobeǁnobehe tidega. Sadu ge aitsama ǂan nēs ǃoa da ǁgaumâihe hâ ǃkhaisa. 4 Sige gere ganupe ge noxopa sadu ǀkha hâ hîa sado ǃgôaǃgonhe ge nî ǃkhaisa mîba xui-ao; tsîs ge nēsa ǁnāti ge ī tsî du ge ǁnāsa ǂan. 5 Tsî ta ge ǁkhāti ǃaruǀî ta tani ǁoa xui-ao Timoteuba sadu di ǂgoms xab nî ǂanǂuise ge sî, îb ga ǃâitsâ-aoba tā sado ǁnātikōse ǃâitsâ tsîb sige sîsenna tā ǁause i.
6 Timoteub ge nēsi go oahā tsîb ge ǃGâiǂhôas sadu ǂgoms tsî ǀnammi disa go hā-ū. ǁÎb ge mâti du sado sige xa ǃgâise ǂâi tsî sige ǂûge khami sadu tsîna ra mû ge ǂgao ǃkhaisa ge mîba ge. 7 Tsî ge ge sige di ǁgâiǀāb tsî ǃgomma tsâs hoas ǃnâ sadu xa ge ǀgaiǀgaiǃnâhe, ǃgâsado, sadu ǂgomsa xu. 8 ǁNā-amaga ge ge sige ûitsama, sadu ga ǃKhūb ǃnâ mâǁapo-o. 9 Mâ gangan-e ge kha ǁnâi Eloba sadu ǃaroma mā ǁkhā, sadu ǃaroma ge sige Elob aiǃâ ūhâ ǃgâiaǂgaoba? 10 Tsî tsēb tsî tsuxuba ǃnāǂamsase Eloba ǃoa ra ǀgorese, sado aitsama mû tsî sadu ǂgoms ǃnâ ūhâ ǃnubusigu ǃnâ nî huise.
11 Ab sada Elob, ǁGûb tsî sada ǃKhūb Jesuba sige daob sadu ǃoa hâba ǂhomiba re. 12 Îb ǃKhūba sadu ǀnamma ǀaroǃnâ, î du ǃnāǂamsasib ǃnâ ǀnamgu, sige ǁkhāti sadu ǃoagu ī khami; 13 î gu ǁnās ǃaroma ǂgaogu âdo ūose ī, ǃanusib ǃnâ, sada Elo tsî ǁGûb aiǃâ, sada ǃKhūb Jesub ga ǁîb ǃanun ǀkha hāo.
© Khoekhoegowab Elobmîs © Bible Society in Namibia, 2020.
