1 “Xawe nēsi gu ge tita xa a ǂkham khoega, tita ra ǃhō!
ǁÎgu îgu ge xū-i tsîna ge ǃgâiba tama hâ i,
ti ǀgoana ra ǃûi arigu ǀkhas tsîna ta a ǃgû kai gu ǁoase.
2 ǁÎgu ǃomgu ǀgaiba tare-e harebeba te hâ?
ǁÎgu ǀgaib ge ge ǁō.
3 ǃGomma tsâs tsî ǃâs xa gu ge dītoahe hâ,
ǂnâsa ǃgaroǃhūb ǃnâ gu ge
ǂnâsa haiga tsuxub ǃnâ ra xâu.
4 ǀKhuru ǁhaon tsî haiǂnaren,
tsî ǀnapuhaidi ǃnomagu tsîn ge ǁîga ǂûse ge ība i.
5 ǁÎgu ge ǀhûhâsiba xu ge sauruǂuihe;
ǃnari-aogu as khamin ge ǁîga gere ǃauǃgâ.
6 ǁÎgu ge ǃāgu di ǃgoaǃnāgu, ǃhūb ǃnâ hâ āgu
tsî ǃgareǀui ǁhoagu tsîgu ǃnâ sī nî hâse ge ǁgariǂuihe.
7 Haiǀgommi ǃnâgu ge ǀgurun khami gere ǃū;
tsî ǀgom ǁkhūhaidi ǃnâ gere gau.
8 ǁÎgu ge ǁnâuǃāoǃnâ, ǀono khoen ôagu,
ǃhūba xu ge sauruǂuihega.
9 “Nēsi ta ge go ǁîgu ǃhōtsana kai;
ǁîgu di ǃhōxū kai ta ge go.
10 ǁÎgu ge tita xa ra uixa
tsî kaise ǃnūse tita xu ra hâ;
îganǀgē-i ose gu ge ti ais ǃnâ ra ǂara.
11 Elob ge ti ǀnaeba ǁara ǃkhais ge ge ǀgaioǃnâ kai te;
khoen ge ǃgôaose ti ǃoagu ra tanisen.
12 Ti amǀkhāba xu gu ra ǂkham khoega ǁnāǂam te;
sauruma te gu ra; tita hîkākāsa gu ra ôa-am.
13 Ti ûidaoba gu ra ǁara tsî tita hîkākāsa hō-am,
khoe-i xa gu huihe tamase.
14 ǂNubiǂgoab khôaǃkhais ǃnâ-ūs khami gu ge ra hā;
ǂnubiǂgoab ǃkhomǃkhais ǃnâ-u gu ge ra hāǂam te.
15 ǃAob ge ge ǃkhō te;
ǂoab xa ǃgombēhe hâ khamis ge ti khoesisa ge kā,
tsî ti ǃgâiǃgâb ge ǃâu-i khami ge bē.
16 “Nēsisa ta ǃaruǀî ûi-e ūhâ tama;
tsēdi ǂōǂōsib didi ge hāǂam te hâ.
17 Tsuxub ra ti ǂkhōga tsûb ǀkha ǃkhāǃkharuǃnâ;
sâ-e mā te tamaseb ra tsûba xâu te.
18 ǁÎb kai ǀgaib ǀkhab ge Eloba sara-i khami ge ǃā te;
sarab di ǃaob ǀkhas khamib ge ra ǃkhōdom te.
19 ǁÎb ge ǂgoab ǃnâ ge aoǂgā te
tsî ta ge tsarab tsî tsaob ǀkha ge ǀgui.
20 “Huib ǃaroma ta sa ǃoa ra ǂgai, xawets ǃeream te tama;
sa aiǃâ ta mâ, xawets ge mû te tama hâ.
21 Kaise ǁkhōǁkhōsasets ge ti ǃoagu ge dabasen;
sa ǃommi di ǁkhāsib hoab ǀkhats ge ra ǁnāǂam te.
22 ǂOas nî ǃgombē te sets ra kuikhâi te
tsîts sa ǁkhōǁkhōsa ǂoas ǃnâ ra ǃhaebema te.
23 ǁŌb kōsets nî ǀkhī-ū tesa ta ge a ǂan,
ǁnā ǃkhais hoaraga khoen ǂhomibahe hâs ǃoa.
24 Amase, ǂkhabutoa hâ khoe-i ǃoaguts ge khâi ǁoa,
ǂōǂōsib ǃnâ i ga ǁî-e ǀkhomxase huiǂgaio.
25 ǃGomma ra tsâ khoen ǃaroma ā tama ta ge hâ i?
ǀGâsan ǃaroma ti ǀomsa ǃoa tamas ge hâ i?
26 Xawe ǃgâina ta ga ôa, ob ra ǂkhababa ǃoa te
tsî ǃnâba ta ga ôa, ob ra ǃkhaenaba ǃoa te.
27 Ti ǂganagab ge ǂkhîoǃnâ tsî hoaǁae sâoǃnâ;
ǂōǂōsib tsēdi ge ǃâu te hâ.
28 ǂNū ta go, xawe sores ǀgamma xus ose;
ǀhûhâsib ǁaegu mâ tsî ta ra huiǂgai.
29 ǀGirib ǀguiba ta ǃgâsase ūhâ
tsî ǀamina, ti ǀhōsan ase.
30 Ti khōb ge ge ǂnû tsî ra ǁnāǁgôa,
tsî ti ǂkhōgu ge ǀgammi xa ra ǂhubi.
31 ǁGoas ai ta ge ti harps ai ǃoab ǀōb ǀguiba gere ǀhuru,
tsî ti ǂnunib ai ǁgamrogu di ǀōb ǀguiba.
© Khoekhoegowab Elobmîs © Bible Society in Namibia, 2020.
