1 Elihub ge ǃaruǀî ge ǃeream:
2 “Nēs a ǂhanu tits ra ǂâi? Sats ge
‘Nēb ge ti ǂhanuba Elob aiǃâ,’ ti ra mî.
3 Sats ga ‘Mâ ǃgâiǃgâ-e ta nî hō? Tamas ka io,
ǁore tama ta ka io, tare-e ta ǁnāpa xu nî hō?’ ti a dîo.
4 Sats tsî sa ǀhōsagu tsîgo
ta ge nî ǃeream.
5 “ǀHommi ǃoa kōkhâi, î mû;
sa ǀgapiga hâ ǃâude ǃgapaǀî!
6 ǁOrets kao, o tare-ets Elob ǃoagu ra dī?
Sa ǁoren ga ǂguiǂguisen, o tare-ets ǁîba ra dī?
7 ǂHanu-aits kao, tare-ets ǁîba ra mā,
tamas ka io tare-eb sa ǃomma xu a hō ǁkhā?
8 Sa ǂkhabasib ge sats khami ī khoe-e ra tsâǀkhā
tsîb ge sa ǂhanu-aisiba, ǀkhara khoena ra hui.
9 “Kai ǁgâiǀā-ain xan ge khoena ra huiǂgai;
ǀgaisan di ǃommi ǃnakaba xun ge ra hui-ôa.
10 Xawe i ge khoe-e dî tama:
‘Mâpab Elob ti Kuru-aob,
tsuxub ǃnâ ǁnaetsanade ra māba hâ? ti;
11 ǁnāb ǃhūbaib di ǀgurun xa ǃnāsase ra ǁkhāǁkhā daba,
tsî ǀhomaniron xa ǃnāsa gā-aisiba ra mā daba?’
12 Khoen ga huiǂgai, xaweb ge Eloba ǃeream tama hâ,
ǂkhabadī-aon di ǂnīǂnīsens ǃaroma.
13 Amase Elob ge harebeoǃnâ mîde ǃgâ tama hâ;
Hoaǀgaixab ge ǁîdi ǀkha ǁae tama hâ.
14 “Hoaǁaets ge Elobats mû tama ti ra mî,
xaweb sa ǁhōba ǁîb aiǃâ hâ,
tsîts ǃnūǃnâxase ǃâu hâse.
15 Tsî nēsits ge Elob ǁaib âb ǃnâ ǁkhara tama
tsî ǁore-i xare-eb ǂan tama ti ǂâi xawe,
16 Jobtse, ǃhoats ran ge a harebeoǃnâ;
ǂan-i ǀkhaiǃnâ mîdets ge ra ǃhoa.”
© Khoekhoegowab Elobmîs © Bible Society in Namibia, 2020.
