1 Ob ge Joba ge ǃeream:
2 “Ti ǃoab mâtikōse a ǃgoms ga ǀnōhe ǁkhā,
tsîb ga ti tsūǀkhāba ǀnō-aixūs ai ǁguihe hâ,
3 o kha ge hurib di ǃhūb xa ga ǃgom hâ.
ǁNā-amagas ge ǂâikorobe ǃhoa ta gorosa,
4 Hoaǀgaixab ǂāgu tita ra ǃkhāǃkharuǃnâ xui-ao.
Ti gagas ge ǁîgu ǃgāba ra ā,
Elob ge ǁîb di ǃhuriǃhuride ti ǃoagu ǃammâi hâ.
5 “ǃGarodâukiba ǀgân tawab ga sī, o āb ra?
Tamas ka io gomaba ǁîb ǂû-i ǃaroma ǃgōb ra?
6 ǃGabu ǂû-e ǂō-i ose ǂû ǁkhāts a?
Tamas ka io ǃupus di ǃuriba ǁkhoa-e ūb hâ?
7 ǁNāǃnôa ǂûna tsâs di tura-e ta ge ūhâ tama,
ǁîn ge ǀaesen kai tes ǀguisa ra hî.
8 “Ab Eloba toxopa ti ǂgansa ǁnâu-am
tsî ti ǁkhoreba dīǀoaǀoaba te re!
9 Ab ga Eloba tita dāǂkhūs ǃaroma māsen,
ǁîb ǁôab ǀkhab ga ti ûiba ǃgaoǁnâsa dītsâ!
10 O ta ge ǁkhaeǂgaob tsî ǃgâiaǂgaob tsîkha ga ūhâ hâ,
mâtikōseb ga ti tsûba kai xawe;
ǃAnu Elob mîde ta ge ǂhara tama i xui-ao.
11 Noxopa ta kha ǃâus di ǀgai-e ūhâ?
Tarebe harebe-e ti ûiba gaxugaxus ǃnâ hâ?
12 ǀUi-i khami ta kha a ǃgari?
Tamas ka ios ti sorosa a brons?
13 Xū-e ta ge ǃaruǀî a dībasen ǁoa;
huiba ta nî ôa-ai khoe-i xare-i ge a ǀkhai.
14 “ǃGomsib ǃnâ hâ ǀhōsa-ets ga ǃgâi tama i,
ots ge Hoaǀgaixab di ǃgôasiba ra ǂhara.
15 Ti ǀhōsagu ge ǃhaese ra ǀkhaiǃnâ ǃkhubis khami ī,
tsî ǂnâsa ǃāgu, nēsi dâuǃnâhe tsî ǃhaese ra ǂnâgu khami.
16 ǁGamǃāgu ge ǃnareb di ǃkhaeb xa ǃgū-aihe hâ;
apa-aigusases ge tsamarosa ǁîga ǀgabo-ai hâ.
17 ǁAero-i khaoǃgâ gu tsuni tsî ra dâubē;
ǁkhuna i ga, o gu ra ǂnâbē.
18 ǁAmaǂharugu-aon ra ǁgamôa;
xawen ǁgamo ǃgaroǃhūb ǃnâ kā tsî ra ǁō.
19 Temas di ǁamaǂharugu-aon ra ǁgam-e kō-ôa;
Skebas di ǁamaǂharugu-aon ra ǃâubasens ǀkha ôa.
20 ǂGomǃgâb ǁîn ǃâubasens dib ra ǁîna taotao;
ǁîn ra ǁgamǃāb tawa sī, xaweb a ǂnâsa.
21 Sago tsîn ge nē ǁgamǃāgu khami go huio;
ti ǃoaǃoaxa mâsiba mû tsî go ge ra ǃao.
22 Sago ai ǀnai xū-e ǂgan ta ge hâ i,
tamas ka io sago ǃkhūsiba
ǀhôagao ǀgaub ai ūbasen ta ge hâ i?
23 Ti khākhoeb di ǃkhōsisa xu ǃnoraǃnora te,
î ti ǁgâiǀā-aon di ǃomma xu ore te, ti mî ta ge hâ i?
24 “ǁKhāǁkhā te, o ta nî ǃnō;
ǁnâuǃā te mâti ta ge dīsā ǃkhaisa.
25 Tare-i kōseb kha amaba a tsûsa!
Mâ ama-e kha sago ǃnâ hâ?
26 Tita go ra mî-unuba ǂgao
tsî ǃâubasenoǃnâ khoeb mîdi
ǂoas ǀguisa i, ti go ra mî?
27 ǃGuniǀgôan ǃaroma go ǀkhūsa ǂnau,
tsî sago ǀhōsaba ra ǁamaxū!
28 Xawe nēsi ǃgâise kō te re;
tita ge sago aidi ǃnâ ǂhumi tide.
29 ǁKhawa ǂâiǃgâ, î tā ǂhanuoǃnâ;
ti ǁhōb a ǂhanu ǃkhaisa ǂanǃgâ re.
30 Ti amǁgaukha aib ǂhumiba ǁgoe khami i ī?
Ti amsa kha ǂkhabab di ǁkhoaba hōǂui ǁoa?
© Khoekhoegowab Elobmîs © Bible Society in Namibia, 2020.
