Nehemiab ge Jerusalems ǁga ra ǃgû
1 Haka ǁkhâgu khaoǃgâ ta ge ǀguitsē, gao-aob Artaxerxesa ǂûb ra hîa ǂauxûi-e ge sī-ūba. ǁÎb ge tita noxopa nēti ǃoasase ge mû tama hâ i, 2 ǁnā-amagab ge ǁîba ge dî te: “Tarexats nēti ǃkhobo hâse ra mûsen? ǀAesen tamats kom hâo. Tsûaǂgaob xas kom nēsao.”
O ta ge kaise ǃao 3 tsî ge ǃeream: “Ab gao-aoba ǀamose ûi re. Mâtis kha ti aisa ǃkhobosase ī tide, ti aboxagu ǁîs tawa ǁkhōhe hâ ǃās khôaǂkhūhe hâ tsî di dao-amdi âsa khauǃkhūhe hâ hîa?”
4 Ob ge gao-aoba ge dî: “Tare-ets ra ǂgao?”
O ta ge ǀhommi di Elob ǃoa ǀgore 5 tsî ǁnās khaoǃgâ gao-aob ǃoa ge mî: “Gao-aots ga tita ǀkha ǂkhîǂâixa tsî ti ǂgansa ūǃoao, mā-am te re, î ta Judab ǃhūb ǁga, ti aboxan ǁîs tawa ǁkhōhe hâ ǃās ǃoa ǃgû tsî ǁîsa ǁkhawa ǂnubikhâi ǁkhā.”
6 Ob ge gao-aoba, gao-aos tsîn ǁîb xōǀkhā ǂnôa hîa, ti ǂgansa ge mā-am te. ǁÎb ge mâtikō ǁaeba ta nî ǃgûs tsî mâ ǁaeb ai ta nî oaǀkhīs tsîna ge dî te, o ta ge ge mîba bi.
7 Tsî ta ge gao-aoba ge ǂgan, îb ǁîb ga ǃgâibaheo, Eufrati huriǂoasǀkhāb di gowoniaga ǃoa hâ sîǂkhanide mā te, î gu ǁîga Judab kōse ta nî ǃkharu ǁkhāsa mā-am te. 8 Tita ge ǁkhāti Asafi, gao-aob di haixa ǃhūb mûǂamaob ǃoa hâ sîǂkhanisa ge ǂgan, îb ǁîba Tempeli dao-ams tawa mâ ommi tsî hâǃnâ ta nî oms tsîra di dao-amdi ǃaroma ǃnaoga mā te. Ob ge gao-aoba ǂgan ta ge xūn hoana ge mā-am te, Elob ge hâǀkhā te i xui-ao.
9 Gao-aob ge ǀnî ǂamkhoegu tsî hāǃgapi ra toroǃkhamaogu tsîga tita ǀkha ge sîsao. Tsî ta ge Eufrati huriǂoasǀkhāb tawa ta ge sī, o gao-aob di sîǂkhanide gowoniaga ge mā. 10 Xawe kha ge Sanbalati, Bet-Horons dib tsî Amonǁî ǂamkhoeb Tobiab tsîkha, khoe-i go Israelǁîn ǃgâib ǃoa i nî sîsense hāsa ǁnâuo, kaise ge tsūbahe.
11 Tsî ta ge Jerusalems tawa ge sī tsî ǃnona tsēdi kōse 12 khoe-i xare-e, tare-e ta Jerusalemsa nî dībasab ge Eloba ǂanǂan te ǃkhaisa ge mîba tama hâ i. ǁNās khaoǃgâ ta ge tsuxuba khâimâ tsî ǀnî aogu ǀkha ge ǃgûǂoa. Tita ge ǃgapi hâ i dâukib ǀguiba ta ge ûitsama xūse ge ūhâ i. 13 ǁNā tsuxub ǃnâ ta ge ǃGoaǃnāb Dao-ams huriǂoasǀkhāb ai ǂnôas ǃnâ-u ǃāsa xu ǂoa tsî ǀGiriguǀausa-u ǃkharu tsî ǀapob ǀgūse ǂnôa dao-ams tawa ge sī. Tsî ta ge ǁnāti ta ǃgûgaruse khôa hâ ǂnubiǂgoagu ǃās digu tsî dao-amdi khauǃkhūhe hâdi tsîna gere kōma. 14 ǁNāpa xu ta ge ǀAus Dao-ams tsî Gao-aob ǁGams kōse ge sī. Xaweb ge ǃgapi ta ge hâ i dâukiba ǃkharuǃkhai-e hō tama ge i, 15 ǁnā-amaga ta ge Kidronǃgoaǃnāba-u ǂoa tsî ǃgapigaruse ǂnubiǂgoaba gere kōma. ǁNās khaoǃgâ ta ge hāxū ta ge ǀkhāb ǁga dabasen tsî ǃGoaǃnāb Dao-amsa-u oms ǁga ge oa.
16 Nau ǂamkhoegu ge mâǀî ta go ī hâ is, tamas ka io tare-e ta go dīs tsîna ge ǀū i. Nēs kōse ta ge Jodeǁîn, pristergu, ǂgaeǂgui-aogu, ǂamkhoegu tamas ka io nē sîsenna nî dī khoe-i tsîna xū-i xare-e ge ǂanǂan tama hâ i. 17 Xawe ta ge nēsi ǁîna go mîba: “Kō re mâti ī ǃgommi ǃnâ da hâsa, Jerusalems khôaǂkhūhe hâ tsî dao-amdi âs khauǃkhūhe hâ xui-ao. Hā, î da Jerusalems ǂnubiǂgoaba omkhâi tsî ǁnās ǀkha sada ǃharaxūba ǀamǀam.” 18 Tsî ta ge ǁîna mâtib ge Eloba hui tes tsî tare-eb ge gao-aoba mîba tes tsîna ge mîba. On ge “A da Jerusalemsa ǁkhawa omkhâi” ti mî tsî nē sîsenni ǃaroma ge ǂhomisen.
19 Xawe gu ge Sanbalati, Tobiab tsî Arabiaǁîb Gesemmi tsîga tare-e da ra dī ǂgaosa gu ge ǁnâuo, âiǂui da tsî ǃhō rase ge mî: “Tare xū-e koma nē du ra dī-e? Gao-aob ǃoagu du ra khâikhâisen ǂgao?”
20 O ta ge ǁîga ge ǃeream: “ǀHommi di Elob ge nî ǃgâiǃgâ kai da. Sida ǁîb di ǃgāda ge nî ǂnubikhâi, xawe sadu ge amǃnâ-i xare-e Jerusalems ǃnâ ūhâ tama tsî ǁîs ǂhanugu ǃnâ amǃnâxa tama hâ.”
© Khoekhoegowab Elobmîs © Bible Society in Namibia, 2020.
