1 Eloxoresa khoe-i ge khoe-i xa i sauruhe tama hîa ra ǃkhoeni, xawe ǂhanu-ai khoe-i ge xammi khami a ǁkhoa.
2 ǃHūb ga khâikhâisenxa, ob ge ǁîba ǂgui ǂgaeǂgui-aona ūhâ, xawe ǁnâuǃāxa tsî ǂansa ūhâ ǂgaeǂgui-ao-i ge hâhâ ra ǂkhîba ūhâ.
3 ǀGâsa ǂgaeǂgui-ao-i ga ǀgâsa khoena ǁgâiǀā, o i ge ǁî-e ǃhanaga ra hâkākā ǀnanub, ǂû-i tsîna ǃgau tamab khami ī.
4 ǂHanuba ra ǃharaxūn ge eloxoresana ra koa, xawe ǁnān ǂhanuba ra ǁnâuǀnamn ge ǂhanuoǃnân ǃoagu ra ǃkham.
5 ǂKhaba khoen ge ǂhanu-aisiba ǁnâuǃā tama, xawe ǃKhūba ra ôan ge ǂhanu-aisiba ra ǁnâuǃā.
6 ǀGâsa tsî ǂhauǃnâse ûis ge a ǃgâi, ǃkhū tsî ǀhôagaose ûis xa.
7 ǂHanuba ra ǃkhōǀgaipe ǀgôan ge a gā-ai, xawe xū tama khoen ǀkha ra ǀhōsagu khoen ge ǁîn îb di taosi.
8 Khoen nau khoen ǀgâsib ai ra ǃkhūn tsî khoen ǃgâisiba tsūse ra sîsenūn di ǃkhūsib ge nî ǀgâsa khoena ra ǀkhomxaǂgaon di kai.
9 ǃKhūb di ǂhanuba ǁnâuǀnam ǂgao tama khoen di ǀgoredi ge a ui-uisa.
10 ǂHanu-ai khoe-e ǂkhaba ǀapedi ǀkha ra ǂgaeǂhapu khoe-i ge ǁî-i ǂhunuma āb ǃnâ nî ǁnāǂgâ.
Xawe ǀhapio khoe-i ge nî matare-oahe.
11 ǃKhū hâ khoe-i ge ǁî-i mûǁae a gā-ai, xawe ǁnâuǃāxa ǀgâsa khoe-i ge ǁî-e ǃnāsase a ǂan.
12 ǂHanu-ai khoe-i ga dan, ob ge kai ǃgâiaǂgaoba hâ; xawe eloxoresa-i ga khâimâ, on ge khoena ra gaugausen.
13 ǁÎ-i dīsāde ra sâu khoe-i ge ǃgâiǃgâ tide, xawe ǁguiǁnâ tsî ga ǀû-i ge Eloba xu ǀkhomma nî hō.
14 ǃGâiǃō i ge khoe-i hoaǁae ǃKhūba ra ǃaoǃgâ-e; xawe ǁnā-i ǂgaob â-e ga karokaro-i ge ǂōǂōsib xa nî hāǂamhe.
15 ǂKhaba ǂgaeǂgui-ao-i ǀgâsa khoena ra ǁgâiǀā-i ge ǃguru ra xammi tamas ka io ǁnāǂam ra bēri khami ī.
16 ǁNâuǃāoǃnâ ǂgaeǂgui-ao-i ge a ǁkhōǁkhōsa ǁgâiǀā-ao; xawe ǂhanuoǃnâ hōǂgāsa ǁkhan hâ khoe-i ge gaxu ûiba nî ūhâ.
17 Nau khoe-i ǀaoba ga ǂnâxū khoe-e, a i ǁō i nî tsēs kōse ǃhū; tā i ǁî-e khoe-i xare-i xa huihe.
18 ǂHanu-aise ra ûi khoe-i ge oresa nî hō, xawe ǀhôagao ûiba ra ûi khoe-i ge āb ǃnâ nî ǁnāǂgâ.
19 ǃHanaba ra ǂhomi khoe-i hoa-i ge ǂâu hâ ǂûna nî ūhâ, xawe harebeoǃnâ dītsâde ra ôa khoe-i ge hoaǁae ǀgâsase nî hâ.
20 ǂGomǂgomsa khoeb ge ǀkhaegu xa nî ǃkhū, xawe ǃkhūsib ǃaroma ra ǃnoe khoe-i ge nî ǁkharahe.
21 ǀKhāǁhûis ge ǃgâi tama hâ; xawe-i ge khoe-e pereǃâro-i ǃaromas tsîna dīsā ǁkhā.
22 Xūǃgunuxa khoe-i ge ǃkhūsiba ra ǃnoeba, xawe i ge ǁî-e ǀgâsib nî ǁî-e hāǂam ǃkhaisa a ǀū.
23 Nau khoe-e ra ǂgōǀau khoe-i ge ǁî-e ra koa khoe-i xa nî ǃgâiǃgâ.
24 ǁÎ-i îb tamas ka io îsa ǀhana tsî ga “Nē-i ge ǂkhabadī tama-e” ti mî khoe-i ge hîkākā-ao-i di horesa-e.
25 Xūǃgunuxa khoe-i ge ǂkhababa ra ǃaroma, xawe ǃKhūba ra ǂgomǃgâ-i ge nî ǃgâiǃgâxa.
26 ǁÎ-i ǁnâuǃāba ra ǂgomǃgâ khoe-i ge gâre; xawe gā-aisib ǃnâ ra ǃgû khoe-i ge nî orehe.
27 ǀGâsa khoenats ga mā, ots ge ǂhâ tide, xawe ǁîna ga mû tama ī-i ge ǀâxareb xa nî xāǂgāhe.
28 Eloxoresan ga ǂgaeǂguis ǃnâ hâ, on ge khoena ra gaugausen; xawe ǁîn ga ǁō, on ge ǂhanu-ai khoena ra ǂguiǂguisen.
© Khoekhoegowab Elobmîs © Bible Society in Namibia, 2020.
