Omuwa na pandulwe
1 Halleluja! Hambeleleni Omuwa!
Onda hala okupandula Omuwa nomwenyo aguhe,
omegongalo lyaantu ye.
2 Iilonga yOmuwa iikumithi ngiini!
Ayehe mboka ye yi hokwa,
ohaa kala noku yi dhiladhila.
3 Ashihe shoka te shi longo,
oshi na esimano nomutumbo;
uuyuuki we otau kala aluhe.
4 Iilongankondo yOmuwa itayi dhimbiwa;
oye omunamutimahenda
nomunalukeno.
5 Mboka haye mu simaneke,
ote ya pe iipalutha;
ita dhimbwa ehangano lye sigo aluhe.
6 Aantu ye ote ya ulukile iilonga ye iikumithi,
sho te ya pe iilongo yiigwana yilwe.
7 Iilonga ye ayihe oyoshili noyu uka,
niipango ye oyi shi kwiinekelwa.
8 Oya kola sigo aluhe;
oyi lile po oshili nuuyuuki.
9 Okwa hupitha aantu ye
nokwa hangana nayo sigo aluhe.
Oye omuyapuki nomunankondo!
10 Okutila Omuwa okwo ekota lyuunongo;
Omuwa ota nongeke ayehe mboka haa vulika kuye.
Na simanekwe aluhe sigo aluhe!
In Praise of the Lord
1 Praise the Lord!
With all my heart I will thank the Lord
in the assembly of his people.
2 How wonderful are the things the Lord does!
All who are delighted with them want to understand them.
3 All he does is full of honor and majesty;
his righteousness is eternal.
4 The Lord does not let us forget his wonderful actions;
he is kind and merciful.
5 He provides food for those who honor him;
he never forgets his covenant.
6 He has shown his power to his people
by giving them the lands of foreigners.
7 In all he does he is faithful and just;
all his commands are dependable.
8 They last for all time;
they were given in truth and righteousness.
9 He set his people free
and made an eternal covenant with them.
Holy and mighty is he!
10 The way to become wise is to honor the Lord;
he gives sound judgment to all who obey his commands.
He is to be praised forever.
