1 Samuel 5 - Herero Revision Bible (HRR)

Otjipwikiro tjOmerikutiropamwe matji eta oumba kOvafilisti

1 Ovafilisti tji va za nokuhuura Otjipwikiro tjOmerikutiropamwe wa Ndjambi ve tji isa mOeben-Eser nave tji twara kOasdod. 2 Nowo ve ketjihitisa mondjuwo onḓere yomukuru wawo wotjisenginina Dagon, nave tji twa meṋe yotjiserekarera tja Dagon. 3 Nu mependukirwa, ovature va Asdod tji va kahita mondjuwo onḓere, arire tji va munu otjiserekarera tja Dagon atja u onḓurumika momurungu wOtjipwikiro tjOmerikutiropamwe wa Muhona. Owo ve tji kengamisa nave tji kuramisa rukwao poṋa patjo. 4 Nungwari mependukirwa reyuva rarwe owo va muna ihi otjiserekarera tjomukuru wawo Dagon atja u onḓurumika rukwao momurungu wOtjipwikiro tjOmerikutiropamwe wa Muhona. Notjiuru tja Dagon nomake tjandje vya teka, nu vya wire momuvero; posi yaindwi orutu rwatjo porwarwo ondwa serwe po. 5 Nga ku ndinondi ovapristeri va Dagon novemukarere avehe opu ve ha zu okuyata komuti omutyakaṋa wokehi yomuvero, tji mave hiti mondjuwo onḓere ya Dagon mOasdod.

6 Muhona wa vera ovature va Asdod tjinene ne ve urumisa. Eye we ve verisa omisuro, novandu avehe mba turire meṋe yawo komikuma avihe wina. 7 Novature va Asdod tji va muna ihi tji tja tjitwa ku wo, arire tji va tja: “Ndjambi wa Israel me tu vere tjinene, nomukuru wetu Dagon wina. Otjipwikiro tjOmerikutiropamwe wa Ndjambi wOvaisrael atji ha uhara ama tji kara pu eṱe rukwao.” 8 Owo otji va hinda ovatumwa, mba kaworonganisa inḓa ozombara ndano zOvafilisti nave ze pura ave tja: “Ngatu tjite vi nOtjipwikiro tjOmerikutiropamwe wa Ndjambi wOvaisrael?”

Nozo za zira nai: “Tji twareye kotjihuro Gat.” Nowo otji ve tji twara ngo. 9 Notjo tji tja za nokutwarewa ngo, Muhona arire tja vere otjihuro hi Gat ne tji purukisa tjinene. Ndjambi wa vera ovature avehe votjihuro nomisuro, omitanda novakurundu. 10 Nu va hinda Otjipwikiro tjOmerikutiropamwe wa Ndjambi kotjihuro Ekron. Notjo tji tja kavaza ngo, ovandu arire tji va ravaere ave tja: “Owo va eta Otjipwikiro tjOmerikutiropamwe wa Ndjambi wOvaisrael nguno kutja tji tu zepe atuhe!” 11 Owo otji va isana inḓa ozombara azehe zOvafilisti nave tja: “Yarureye Otjipwikiro tjOmerikutiropamwe wa Ndjambi wOvaisrael hi koṋa ku tji kara kutja atji he tu zepa nomaṱunḓu wetu.” Motjihuro atjihe mwa kara omburukiro onene, Ndjambi tjinga a vera ovature vatjo. 12 Nangarire imba mbe ha kokere va verwa nomisuro novandu va kwa ombatero koomukuru vawo.