Eziriro esenina ra Job
1 Job wa zira a tja:
2 “Ove, tjiri, oove ombatero yatjiri ku ami,
ami ngu mbi ri
omundu omusyona notjingundi!
3 Ove we ndjipa ondunge ombwa,
nohaṋasana ondjiviro yoye kuna
eyova tjimuna ami.
4 Mo ripura kutja owaṋi ngu ma
zuu komambo woye aehe,
nowaṋi ngwe ku pe ombepo
yokuhungira nai?
5 “Ozombepo zovaṱi maze
zezera kehi yehi;
nomeva na imbi mbi ri mu wo,
wina mavi tira.
6 Otjovakoke tja yezuruka
komurungu wa Ndjambi;
kape notjikutjire tji matji
tji kutjire komurungu we.
7 Ndjambi wa parangisa evaverwa
rokeyuva kokunene,
na rekarekisa ehi kombanda
yopoṋa pu pe ri tjo.
8 Ndjambi ongu urisa ovikamba nomeva,
nu ongu tjaera kutja avi ha
pamunwa i ondjinda yawo.
9 Nu imbi ovikamba eye
u tjizikiza na vyo omueze.
10 Eye wa haṋa ondjerera konḓorera na
kondorokisa omuruko kombanda yokuvare.
11 Eye tji ma tanda ozongunḓe,
nḓa ṱizira evaverwa kombanda,
maze teratera naze zezerisiwa i omburuma.
12 Omasa we onge taara okuvare;
nounongo we, eye wa
hahaura ongurunyoka Rahab.
13 Eye wa kohorora evaverwa
nomasuvaneno we,
neke re onda zepa onyoka ondaure.
14 Nungwari oviṋa mbi ovyo ovipezeze
uriri vyomasa we, ovyo
omahokorero uriri eṱe ngu twa zuva.
Ouṋe ngu ma tjiwa kutja ounene wa Ndjambi,
tjiri, u ṱa pi?”
© Herero Revision Bible © Bible Society in Namibia, 2021.
