Okutja okuhepa kokuyamwa konḓiro
1 Ami mba suvera Muhona,
orondu eye u zuvira
ozongumbiro zomerihekeneno wandje.
2 Eye u puratena ku ami,
aruhe tji me ku ku ye.
3 Omapando wonḓiro ye ndji pandeka;
omburuma yonḓiro ya wira kombanda yandje;
mba kara nombamisiro nomerikendero.
4 Ami mba kwa ku Muhona e tja:
“Muhona, arikana ndji yama!”
5 Muhona eye omunatjari
nomunausemba,
Ndjambi wetu u ṱondjenda na eṱe.
6 Muhona u yama imba mbe
ha munu ombatero;
tji mbiri moumba,
eye u ndji yeura.
7 Muinyo wandje,
hirimana u suve;
orondu Muhona wa
tjita ouwa ku ami.
8 Muhona we ndji yama konḓiro;
eye wa yeka omahoze wandje,
nu wa tjaera ombaze
yandje komaputarero.
9 Ami otji me ryanga komurungu
wa Muhona,
mehi rovanamuinyo.
10 Mba panḓera pokukambura move,
nandarire kutja mba tja:
“Ami mba yanda mba,”
11 nandarire kutja mba tira ne tja:
“Kape nomundu ami ku me sora
okuriyameka.”
12 Muhona me mu sutu na tjike
kouwa auhe eye mbwe ndji tjitira?
13 Ami me vanga okumupunguhira
ombunguhiro yomanuwa kutja
mbi tje okuhepa kombatero ye.
14 Ami me yenenisa omakwizikiro
wandje ku Muhona
mombongarero yotjiwaṋa tje atjihe.
15 Omukarere umwe omuṱakame
wa Muhona tja ṱu,
tjiri, ma rire otjihihamise ku ye.
16 Owami omukarere woye, Muhona;
ami mbi ku karera
tjimuna mama tjaa tjiti.
Ove we ndji yama konḓiro.
17 Ami me ku punguhire
ombunguhiro yokutja okuhepa,
nu me ku kena ra Muhona.
18 Me yenenisa omakwizikiro wandje
ku Muhona
mombongarero yotjiwaṋa tje atjihe,
19 morupanda rwondjuwo
ya Muhona,
moukoto woye, Jerusalem!
Tangeye Muhona!
© Herero Revision Bible © Bible Society in Namibia, 2021.
