Omapsalme 52 - Herero Revision Bible (HRR)

Ombanguriro ya Ndjambi notjari tje

Komuimburise. Epsalme ra David, Doeg, Omuedom, tja za nokuyenda ku Saul okukemuraera kutja David wa ire kondjuwo ya Ahimelek.

1 Mo rihivire tjike nourunde woye,

ove murumendu woutwe?

Orusuvero rwa Ndjambi ru karerera

nga aruhe.

2 Ove u ripura nokutjita oumba kovakweṋu;

eraka roye ri ri otja orukurure orutwe.

Ove aruhe u kora ovizeze.

3 Wa suvera ourunde pouwa,

nu u kora ovizeze pokuhungira ouatjiri.

4 Wa suvera okuhihamisa ovakweṋu

nomambo woye,

ove munavizeze.

5 Ndjambi me ku yandeke nga aruhe;

eye me ku kambura ne ku ṱukuṱura

mondjuwo yoye,

nu me ku isa mo mehi rovanamuinyo.

6 Ovasemba mave munu otjiṋa hi

nave tira;

nowo mave ku yoro nave tja:

7 “Tareye, ingwi eye omurumendu

ngu ha vangere Ndjambi kutja

ma rire ondjamo ye,

nungwari moruveze rwanao we riyameka

koutumbe we ounene

nu a wama mourunde we.”

8 Nungwari ami mba muna ondjeverero

mondjuwo ya Ndjambi,

otja omuṋinga omutarazu mbu kura,

nu ami me riyameke korusuvero rwe oruṱakame

aruhe nga aruhe.

9 Ami me ku tanga nga aruhe, Ndjambi,

mena raimbi mbi wa tjita.

Me zuvarisa ena roye momurungu wotjiwaṋa tjoye,

ove tjinga au ri omuwa.