Ondaya younongo
1 Muatje wandje, yakura imbi mbi me ku hongo, nu o zembi ko imbi mbi me ku raere okutjita. 2 Puratena ku imbi mbi ri ovyounongo, nu u kondje okuvizuva nomutima auhe. 3 Ii, ningira ondjiviro, nu u riyarikaṋe ozondunge! 4 Paha ounongo tjinene otja tjotjo kondja okusa osilveri kehi yehi poo otja tjotjo paha otjihuze tjorive tji tja horekwa, 5 nove otji mo tjiwa kutja ondira ku Muhona mai hee tjike, nu otji mo yenene okukara nondjiviro ya Ndjambi. 6 Muhona ongu yandja ounongo; ku ye ku za ondjiviro nozondunge.
7 Eye onguri ombwiro yombatero noyondjamo kovandu ovasemba na ku imba ovaṱakame. 8 Eye u yama imba mbe tjita ousemba kovakwao, nu u tjevera ondjira yaimba mbe riyameka ku ye.
9 Tjinangara mo puratene ku ami, mo tjiwa ousemba nokutjita ousemba nouatjiri. Mo tjiwa ondjira ndji twara kouṋingandu. 10 Ove mo rire omunaunongo, nondjiviro yoye mai ku pe ondjoroka. 11 Oukengeze nozondunge zoye mavi ku tjevere navi ku yama, 12 nu mavi ku tjaere kourunde. Ovyo mavi ku yepisa novandu mba mbe tjita oumba nomahungi wawo wovizeze, 13 na imba mba isa ongarero ombwa nave kakara monḓorera youvi, 14 na imba mbe muna ondjoroka mokutjita ouvi nu mbe yorokera ouvi, 15 na imba mbe ryanga mozondjira ozongoko zotjiwova nave twara ozondjira zoposyo.
16 Ove mo yenene okupenga omukazendu womukweṋu ngu ma kondjo okukupopa nomambo omawa, 17 omukazendu ngu hi nouṱakame momurumendu we omuini, nu ngu zemba oruyano rwe rworukupo ndwa tjita komurungu wa Ndjambi. 18 Tji mo i kondjuwo ye, pa sana nokuyenda konḓiro. Okuyenda ngo oko okuryama popezu notjovakoke. 19 Avehe mbe yenda ku ye, kape na umwe wawo ngu kotoka; eye ka roro okukotoka kondjira yomuinyo. 20 Ove otji mo sokuhorera kotjikaro tjovandu ovawa nokukara mondjira yovasemba. 21 Orondu ovandu ovasemba, ovandu ovehinandjo, ombu mave tura mehi retu ndi. 22 Nungwari Ndjambi ma hakana ovarunde mehi, nu ma zukura ovanauvi mu ro otja ovihape mehi.
© Herero Revision Bible © Bible Society in Namibia, 2021.
