Mika 6 - Herero Revision Bible (HRR)

Otjiposa tja Muhona kuna Israel

1 Purateneye kotjiposa tja Muhona kuna Israel.

Sekama, Muhona, u hungire otjiposa tjoye, kutja ozondundu novivanda vi zuve mbi mo hungire.

2 Eṋe zondundu, eṋe mazikameno wehi omakarerere, purateneye kotjiposa tja Muhona! Muhona una otjiposa kuna otjiwaṋa tje, nu ma vanga okuyandja ondjo kOisrael.

3 Muhona ma tja nai: “Tjiwaṋa tjandje, hapo mba ungura tjike kove, nu mbe ku urisa na tjike? Ndji zira. 4 Ami mbe ku pitisa mehi ra Engipte ne ku kutura, nu mbe ku hindira ooMoses na Aron na Miriam okukuhongorera. 5 Tjiwaṋa tjandje, zemburuka kutja Balak, ombara ya Moab, we ripurire na tjike, nokutja Balaam, omuzandu wa Beor, we mu zirire vi; zemburuka imbi mbya tjitirwe okuza kOsitim nga kOgilgal. Rizemburuka noviṋa mbi nove otji mo munu imbi mbi mba tjita okukuyama.”

Oviṋa Muhona mbye vanga

6 Hi ete tjike komurungu wa Muhona tji meya okurikotamena ku Ndjambi weyuru? Hi ete ozondana ozondume okuzepunguhira ye ze rire ozombunguhiro ozoningiririsiwa are? 7 Indu Muhona ma kara nonyuṋe mozondwezu zozonḓu omayovi poo momipupo vyomaze womiṋinga mbi hi nondjandero are? Hi mu punguhire otjiveri tjandje kokusuta ondjo yomauvi wandje are? 8 Ayee kako! Atjihe otjiwa eṱe twa tjivisiwa. Ihi Muhona tji ma ningire ku eṱe otjo hi: Okutjita ousemba, okusuvera Ndjambi novandu norusuvero oruṱakame norukarerere, nokukara nomahakaeneno kuna Ndjambi wetu.

9 Okokuwa okukara nondira ku Muhona. Eraka re mari ravaere nai kotjihuro: “Zuveye, vature mbu mwa woronganena motjihuro! 10 Mozondjuwo zovanauvi nga mba mu novihuze vyouhasemba. Owo ve ungurisa ovisanekero vyoposyo mbi mba tonda. 11 Me yenene vi okuisira ovandu mbe ungurisa ovisanekero vyoposyo novitenda vyondjinda vyovineya? 12 Ovatumbe motjihuro ve ura noutwe; nu imba ovature vatjo ve hungira ovizeze novineya. 13 Ami opu me ku verere notjirwaro otjihihamise nomayandekero mena rourunde woye. 14 Ove mo ri nu ko nokukuta; tjiri, mo ṱondjara. Tji wa toora oviṋa okukapwika, ko nokukeviṱakamisa; avihe mbi wa pwike ami me vi nyono movita. 15 Ove mo kunu ovikokotwa, nungwari ko nokuvikonda ko; mo kama omaze womiṋinga, nu ko nokurivava na wo; mo kama omeva womandjembere, nu ko nokuyenwa ko. 16 Imbi mavi tjitwa mena rokutja wa horera kongarero ombi yombara Omri noyomuzandu we, ombara Ahab. Ove wa ryanga otja konḓero yawo, notji me ku yandeke, novandu avehe ave ku nyekerere. Novandu ngamwa akuhe mave ku tara nomanyengu.”