Haman me ripura okuyandeka Ovajuda
1 Kombunda yoruveze rworive ombara Kerkes wa yera omurumendu wena Haman kotjihavero tjomunane ombondo. Haman wa ri omuzandu wa Hamedata, ondekurona ya Agag. 2 Ombara ya rakiza kovahongore avehe mba ri moviungura vyawo kutja ve raise ondengero ku Haman amave woro ozongoro nokuripeta kuye. Avehe va tjita nao, posi ya Mordekai ongwa panḓa okutjita nao. 3 Ovahongore ovakwao mba ri moviungura vyouhona va pura Mordekai kutja okutjavi tje hi nokukara nonḓuviro komarakiza wombara. 4 Owo ave mu kondjisa eyuva arihe kutja e riyandje, nungwari eye ka puratenene ko ku wo, e ve raere a tja nai: “Ami owami Omujuda, nu hi nokusora okuripeta ku Haman.” Owo otji va raera otjiṋa hi ku Haman ve mune kutja Haman ma yenene okuzara ongaro ndji ya Mordekai. 5 Haman wa pindika tjinene tja muna kutja Mordekai ke nokuwora ozongoro nokuripeta ku ye. 6 Neye tja zuva kutja Mordekai Omujuda arire tje rimana okutjita otjiṋa tjarwe komeho pokuvera Mordekai porwe. Eye wa paha ondunge yokuzepa Ovajuda avehe mouhona auhe wOvapersie.
7 Mombura oitjamurongo na mbari youhona wa Kerkes, momueze omutenga Nisan, Haman otja rakiza kutja pe yumbwe ozohanga nḓe isanewa kutja “Purim,” okupaha eyuva nomueze omusemba eye ndi ma sekamene Ovajuda. Eyuva ndi oritjamurongo na yetatu onda zikamisiwa komueze outjamurongo na vivari Adar.
8 Haman otja raera ombara a tja: “Pe nomuhoko worive mbwa rimbara akuhe mouhona woye, nu mbu munika motukondwa atuhe mouhona woye. Owo u notuzo tu tu ha sanene na itwi twovandu avehe varwe. Nokombanda yanao, owo kau nonḓuviro komatwako wouhona, nove komoo sora okuuzara otja konḓero yoye. 9 Tji movanga, muhona ombara, zikamisa etwako rokutja owo u sokuṱa. Tji wa tjiti nai, ami me yenene okuyandja osilveri yondjinda yozokirograma omayovi yetatu nomirongo vine kovahongore vouhona kutja ve vi twe motjipwikiro tjovihuze vyouhona.”
10 Ombara ya isa ko ongoho yayo komunwe, ndjaa i ṋiṋikizirwa otja omunwe kembo okuzikamisa ondyero, nai yandja ongoho ndji komunavita nOvajuda, Haman, omuzandu wa Hamedata, ondekurona ya Agag. 11 Ombara ye mu raera nai: “Ovimariva ovyoye, nOvajuda wina ovoye; tjita ku wo otja pu movanga!”
12 Meyuva oritjamurongo na yetatu komueze omutenga, Haman otja isana ovatjangerepo vombara, ne ve resere omaraerero kutja ye rundururwe meraka arihe na momihingo vyomatjangero nge ungurisiwa mouhona, nokutja ye hindwe ku avehe mba, okutja ovanane nozongooneya novakarere vouhona. Omaraerero nga ya yandjewa mena rombara Kerkes, naku ṋiṋikizirwa ko otjihako nongoho ye yokomunwe. 13 Ovanatjikara va handjaura omaraerero nga kotukondwa atuhe twouhona. Owo ya ri nomatjivisiro nga wokutja meyuva rimwe ndo, oritjamurongo na yetatu ra Adar, Ovajuda avehe, omitanda novakurundu, ovakazendu novanatje, mave sokuṱa. Mave ṱu nokuhinotjari, nouini wawo mau huurwa. 14 Omambo nge ri momaraerero nga maye sokutjivisiwa koviwaṋa pekepeke, momahi aehe kokutja eyuva ndo tji re ya, vi vazewe avye rirongere.
15 Otja komarakiza wombara omatjangwa nga ya tjivisiwa motjihuro ohongora Susa, novanatjikara va handjaura ombuze ndji momahi aehe. Ombara na Haman tjandje nao va haama mave nu, otjihuro Susa ngunda ama tji zungana.
© Herero Revision Bible © Bible Society in Namibia, 2021.
