1 “Ami mba urwa okukara nomuinyo.
Puratena kondjemeno
yandje ondetarise, Ndjambi.
Mombamisiro yomuinyo
wandje me hungire.
2 O ndji pangura, Ndjambi.
Ndji raera! Otjiposa tji u na
tjo na ami otjatjike?
3 Osemba kove tji mo tjiti outwe nai are?
Tji mo nyengwa imbi ove
omuini mbi wa ungura are?
Nu tji mo yorayora
kondunge yovanauvi are?
4 Ove mo munu oviṋa otja
omundu tje muna are?
5 Omuinyo woye omusupi
tjimuna owetu are?
Ozombura zoye ze kapita
tjimuna omayuva womundu are?
6 Okutjavi tji mo teza
ourunde wandje aehe,
nu tji mo paha ozondataiziro
zandje azehe nḓu mbi na zo?
7 Ove mo tjiwa kutja ami hi nondjo,
nokutja kape nomundu
ngu me ndji yama kove.
8 “Omake woye onge ndji zezenga,
nu onge ndji mema;
nambano omake tjingewo
ongu maye ndji nyono.
9 Zemburuka kutja ove we
ndji ungura pomunoko;
nambano mo ndji ṱukuṱura
mbi yaruke koruuma are?
10 Ove wa yandja omasa ku
tate kutja e ndji kwate;
Ove we ndji kurisira
mezumo ra mama.
11 Ove wa tunga orutu rwandje
nomaṱupa nomisepa,
nu wa mema orutu rwandje
nomaṱupa nonyama nomukova.
12 Ove we ndji pa omuinyo
norusuvero oruzikame,
nomerikendero woye ye
ndji ṱiza kutja mbi hupe.
13 Nungwari nambano ami me
tjiwa kutja oruveze aruhe ndwi ove
ooripura okundjihihamisa mongumumu.
14 Ove oondjitjevere kutja me tjiti ourunde,
kokutja u panḓe okundjiisira.
15 Tjimanga tji mba zu nokutjita ouvi,
ami tjandje mbi ri moumba kove,
nungwari tji mba tjiti ousemba,
hi nokupewa ondjambi.
Ami mba ningisa ondjenda nu mba ṱohoṋi.
16 Andakuzu ami mbi ri yera omuini,
ove otjo ndji yeva otja ongeyama;
notjiti ovihimise, kutja u ndji hihamise.
17 Ove aruhe u kara novahongonone
tjiva okundjipirura;
omazenge woye ku
ami ye ryamena ko;
nove aruhe u ndji rwisa
novimbumba ovipe vyovita.
18 “Okutjavi, Ndjambi,
tji wa tarera ame kwatwa?
Andakuzu mba koka,
ngunda ambi hiya munika komundu!
19 Atja rira kokuwa
okuza mezumo ra mama
nokuyenda ongarate keyendo,
komurungu wokukara nomuinyo.
20 Omuinyo wandje kau ri pokuyanda are?
Ndji esa mbi rikarere erike!
Ndji esa mbi yoroke
moruveze ndu mba sye po.
21 Ami me i tjimanga, nu himee kotoka;
me i kehi ronḓorera noromuzororema,
22 kehi ronḓorera
noromuzire noromazunganeno,
ondjerera oini ku i ri onḓorera.”
© Herero Revision Bible © Bible Society in Namibia, 2021.
