Josua 23 - Herero Revision Bible (HRR)

Omavirikiziro omasenina wa Josua

1 Kombunda yoruveze orure tjinene, Muhona tja za nokusuvisa Ovaisrael kovanavita na wo, Josua tjandje wa kurupire tjinene. 2 Eye otja isana Ovaisrael avehe, ovanene novanane novapangure novahongore votjiwaṋa, na tja ku wo: “Ami nambano mba kurupa tjinene. 3 Eṋe mwa muna oviṋa avihe Muhona, Ndjambi weṋu, mbya tjita koviwaṋa mena reṋu. Muhona, Ndjambi weṋu, we mu rwira. 4 Tareye! Ami mba yandja omahi woviwaṋa mbi mbya hupa ye rire ouini womihoko vyeṋu, na wina omahi woviwaṋa avihe ami mbi mba havera okuza kOjordan komuhuka nga kOmuronga Mediterania kongurova. 5 Muhona, Ndjambi weṋu, omuini me vi humburura na eṋe tji mamu ryama ne vi ramba. Nu mamu kambura ehi rawo otja Muhona, Ndjambi weṋu, pe mu kwizikira. 6 Kareye nonḓuviro nouṱakame amamu tjiti avihe mbya tjangwa mEmbo rOmatwako ra Moses. Amu pengura omazikamisiro waro nangarire kaṱiṱi. 7 Amu wana noviwaṋa mbi mbya sewa mokati keṋu, nu amu tamuna omana woomukuru vavyo vovisenginina; nu amu yana ku wo; amu ve karere nu amu rikotamene ku wo. 8 Nungwari rikotameneye ku Muhona, Ndjambi weṋu, otja tji mwa kara nga ku ndinondi. 9 Muhona wa ramba oviwaṋa ovinene novinamasa tjinene komurungu weṋu; nu nga mba kapa ri tjimwe tji tja yenena okupirukira eṋe. 10 Auhe weṋu ma yenene okuramba ovandu eyovi, orondu Muhona, Ndjambi weṋu, me mu rwire otja pe mu kwizikira. 11 Tjiteye ouatjiri kutja mamu suvere Muhona, Ndjambi weṋu erike. 12 Tji mamu poka namu wana noviwaṋa mbya sewa mokati keṋu, namu kupasana na vyo, 13 nu tjiweye nawa kutja Muhona, Ndjambi weṋu, ke tji nakuramba oviwaṋa mbi komurungu weṋu, eṋe tji mamu ryama. Nungwari ovyo mavi rire oumba ku eṋe otja ombate poo otjitoto, navi mu hihamisa tjimuna ongora momatambo weṋu, nomakuiya momeho weṋu. Ihi matji kara nga amuhe tji mwa yandekerwa mehi ewa ndi, Muhona, Ndjambi weṋu, nde mu pa.

14 “Tareye, ami nambano mbi ri pokukoka. Auhe weṋu ma tjiwa momutima na momuinyo we kutja Muhona, Ndjambi weṋu, we mu yenenisira omambo aehe omawa nge mu kwizikira. Aehe nge mu kwizikira ya yenenisiwa; kape na rimwe nda kaera. 15 Nungwari otja inga omambo omawa aehe, Muhona, Ndjambi weṋu, nga hungirire ku eṋe, punga aya tjitwa, ozondandero za Muhona ku eṋe opunga amaze tjitwa wina. 16 Tji mu hi nokuṱakamisa omerikutiropamwe, Muhona, Ndjambi weṋu, nge mu rakiza okuyeṱakamisa nu tji mamu karere oomukuru vovisenginina namu rikotamene ku wo, eye me mu vere momazenge we nga tji pe hi na umwe ngu ma sewa po mehi ewa ndi Muhona nde mu pa.”