Jerusalem kombunda yomawiro watjo
1 Ongoldo yetu ongeṋangeṋe ya rira onḓumbe;
omawe wondjuwo ya Muhona
ya rimbara momivanda.
2 Ovazandu va Sion va ri ovahuze
ku eṱe otja ongoldo ongohoke,
nungwari nambano va ṱekisiwa
pozonyungu zomunoko zakauriri.
3 Nandarire ombandje onḓenḓu
i nyamisisa ounatje wayo,
nungwari ovasuko votjihuro tjandje
va umbira ovanatje vawo tjimuna
ozombo mokuti onguza.
4 Ve zepaisisa ovanatje vawo kondjara nonyota;
ovanatje ve ningira ovikurya,
nu kape ningi umwe ngu meve pe.
5 Ovandu mbaa ve ri ovikurya oviwaviwa rukuru,
nambano mave ṱu i ondjara momivanda;
imba mbe kurira mevyaro,
nambano mave pyanga ovikurya moviyaya.
6 Otjiwaṋa tjandje tja verwa tjinene,
nangarire povature va Sodom,
mba wirwa i otjiwonga tja tjimanga
meke ra Ndjambi nokuhinokuvaterwa i omundu.
7 Ovaingona vetu kave zunḓakere,
nu va ri ovakohoke otja ovitutukende,
owo va ri ovazeu novanamasa,
nu va ri nomberukiro ombwa tjinene.
8 Nungwari nambano owo ve rangavara
momivanda nokuhinokuzemburukwa,
ombunikiro yawo ya zorera komuhingo wombize,
omikova vyawo vya kukuta tjimuna omuti,
nu vya kanyatera komaṱupa wawo.
9 A ri kokuwa ku imba mba ṱa movita
pu imba mba ṱa i ondjara,
nu mbe ha ri novikurya okurikareka nomuinyo.
10 Otjiwonga tji tja taurira motjiwaṋa tjandje
tja eta oruhoze;
ooina mba suvera ovanatje vawo,
mave ve tereke okuveisapo ovikurya.
11 Muhona wa surumukisa
omazenge we omanene.
Eye wa rundisa omuriro mOsion,
nowo we tji seseta okumana.
12 Kape nomundu ngamwa apehe,
nangarire inḓa ozombara
zoviwaṋa vyozonganda,
ngwa ri nongamburiro yokutja mape ya
omurwise omunavita a hiti
momivero vya Jerusalem.
13 Nungwari ihi tja tjitwa mena rokutja
ovaprofete vatjo va tjita ourunde,
novapristeri vatjo va tura ondjo yokutirahi
ombinḓu yovandu ovehinandjo motjihuro.
14 Ovanane vatjo va ryanga momivanda
tjimuna ovapoṱu,
nowo va rimbarere ombinḓu tjinene nai,
nga tji pe hi na ngwa ṱuna kozombanda zawo.
15 Ovandu va ravaera ave tja:
“Zapweye! Oweṋe ovahakohoke!
Eṋe mwa zunḓaka! Amu ṱunu ku ami!”
Owo opu va ryangera okuza kotjiwaṋa
tjimwe nokuyenda ku
tjarwe nokuhinokuyakurwa.
16 Muhona ke tji na ko na tja na wo;
eye we ve rimba omuini.
Eye ka raisire ondengero kovapristeri vetu,
nu ka ṱirire ovanane vetu otjari.
17 Eṱe twa paha ombatero,
nungwari a ri omungandjo.
Eṱe twa kara pokuundja ombatero okuza
komuhoko mbu ha ri na yo okutupa.
18 Ovanavita aave tu tjevere;
eṱe kaatu ryanga nangarire momivanda.
Omayuva wetu ya kapita;
ondjandero yetu ye ya.
19 Owo ve tu ramba notjikara otjinene
potjozonguvi nḓu maze rauka meyuru.
Owo ve tu tezera mozondundu;
ve tu kamburira mokuti onguza tjimanga.
20 Owo va kambura omburo yominyo vyetu,
okutja oyo ndji ombara ndja
toororerwe i Muhona,
ku twe riyamekere kutja mai tu
yama koveturwise avehe.
21 Yorokeye, tjiwaṋa tja Edom,
mbu mu tura mehi ra Us;
nyandeye ngunda amamu sora!
Okuyandekwa kweṋu maku ya wina,
neṋe wina mamu teratera muzu amwa ṱohoṋi.
22 Sion, omberero yoye ya manuka;
Muhona ke tji nokukuṱizira
mouhuura rukwao.
Nungwari Edom, Muhona me ku vere
nu ma vandurura ourunde woye.
© Herero Revision Bible © Bible Society in Namibia, 2021.
