Naeman ta aludhwa
1 Naeman, ondjayi yetangakwiita lyAasiria, okwa li a simanekwa noonkondo nokwa li e na oshilonga oshinene pomukwaniilwa gwaSiria, oshoka omolwaNaeman Omuwa a gandja esindano kaakwiita yaSiria. Naeman okwa li omukwiita ependa, ihe okwa li a hepekwa koshilundu. 2 Mekumbu lyawo limwe mokulwa naIsrael, Aasiria oya kwata po okakadhona Okaisraeli, noka ningi omupika gwomukulukadhi gwaNaeman. 3 Esiku limwe omukadhona okwa lombwele mwene gwe a ti: “Nda hala tuu, omuwa gwandje a ye komuhunganeki e li muSamaria! Ote ke mu aludha oshilundu she.” 4 Naeman sho e shi uvu, okwa yi komukwaniilwa e te mu lombwele, shoka omukadhona a popi. 5 Omukwaniilwa okwa ti: “Inda komukwaniilwa gwaIsrael, u mu faalele ontumwafo ndjika.”
Naeman okwa yi e na iimaliwa yiisiliveli omayuvi omilongo ndatu, iimaliwa yoshingoli omayuvi gahamano nomitsuhu omulongo dhuuyamba. 6 Ontumwafo ndjoka a faalele omukwaniilwa gwaIsrael, otayi ti: “Otandi tumu elenga lyandje Naeman pamwe nontumwafo ndjika kungoye. Onda hala, u aludhe uuvu we woshilundu.”
7 Omukwaniilwa gwaIsrael sho a lesha ontumwafo, okwa kunkwa e ta tuula oonguwo dhe ti igidha ta ti: “Omukwaniilwa gwaSiria ota vulu ngiini okudhiladhila, ndi aludhe omuntu nguno? Ota dhiladhila kutya ongame Kalunga ndi na oonkondo okumwenyeka nokudhipaga. Ndika ehindo ta kambadhala okuhinda ndje shila!”
8 Omuhunganeki Elisa sho a kundana shoka sha ningwa po, okwa tumu elaka komukwaniilwa tali ti: “Omolwashike wa piyagana? Tuma omuntu ngoka kungame notandi ke mu ulukila kutya muIsrael omu na omuhunganeki.”
9 Naeman okwa yi nuukambe we netemba lye e ta thikama peelo lyegumbo lyaElisa. 10 Elisa okwa tumu omupiya, e mu lombwele, a ye e ki iyogele luheyali momulonga Jordan, nota aluka thiluthilu kuuvu we woshilundu. 11 Ihe Naeman okwa zi po a sa ondjahi ta ti: “Onda li ndi shi, ote ya kungame nokuli, ta galikana Omuwa, Kalunga ke, ta fungafunga noshikaha she kombanda yehala lyoshilundu e ta aludha ndje! 12 Nokuli Abana naParpar, omilonga dhomuDamaskus, odhi vule omilonga adhihe muIsrael? Onda li te vulu okwiiyogela mudho, ndi aluke!”
13 Aapiya ye oya yi kuye e taa ti: “Tatekulu, omuhunganeki ando okwa li e ku lombwela sha oshidhigu, ando ino shi ninga? Ngashingeyi oshike itoo iyogo, ngaashi a ti, e to aluka?” 14 Nena Naeman okwa yi kuJordan, i ininginitha mo luheyali, ngaashi Elisa e mu lombwele, nokwa aluka thiluthilu. Olutu lwe olwa ningi lwa fa lwomugundjuka nolwa yela. 15 Okwa galukile kuElisa naantu ye ayehe e ta ti: “Ngashingeyi ondi shi shi kutya kaku na kalunga gulwe kakele kaKalunga kaIsrael awike, onkee ano, tatekulu, kwatha ndje u taambe omagano gandje.”
16 Elisa okwa yamukula a ti: “Otandi gana kOmuwa omunamwenyo, ngoka handi mu longele, kutya itandi taamba omagano nando.”
Naeman okwa thiminike, e ga taambe, ihe ine ga taamba. 17 Nena Naeman a ti: “Ngele ino hala okutaamba omagano gandje, etha ndje ndi humbate evi komamulutiya gaali, ndi li faalele kegumbo oshoka okuza nena ndjika itandi ka yamba we efikilondjambo nenge ontselelandjambo kukalunga gulwe, ihe okOmuwa awike. 18 Ondi inekela kutya Omuwa ota ka dhimina ndje po, uuna te thindikile omukwaniilwa gwandje, sho ta yi kotempeli yaRimmon, oshikalunga shaSiria, note shi inyongamene e egamena kokwooko kwandje. Oshili, Omuwa ota ka dhimina ndje po!”
19 Elisa okwa ti: “Inda nombili!” Naeman okwa yi.
Naeman okwa adhika e ende owala oshinano oshishona, 20 sho omupiya gwaElisa Gehasi i ipopile ta ti: “Hm, mwene gwandje okwe etha Naeman inaa futa nando osha! Okwa li e na okutaamba shoka Omusiria kwa li ta gandja. Oshili, ngaashi Omuwa e na omwenyo, otandi tondoka, ndi mu landule ngaye ndi taambe sha kuye.” 21 Osho ngaaka a landula Naeman. Naeman sho a mono omuntu te ya tondokele e ya landula, okwa londoloka metemba e ta yi, e ke mu tsakaneke. Okwe mu pula ta ti: “Ope na epuko lyasha?”
22 Gehasi okwa ti: “Aawe, ihe mwene gwandje okwa tumu ndje, ndi ku lombwele kutya moshilongo shokoondundu dhaEfraim omwa zi aahunganeki yaali aagundjuka, mboka opo ya thiki kuye. Ya pa iimaliwa iisiliveli omayuvi gatatu nomitsuhu mbali dhuuyamba.”
23 Naeman okwa yamukula a ti: “Kwatha ndje u taambe iimaliwa iisiliveli omayuvi gahamano.” Okwe mu thiminike e ta mangele iisiliveli moompunda mbali e te dhi gandja nomitsuhu mbali dhuuyamba kaapiya ye yaali e te ya tumu mewiliko lyaGehasi. 24 Sho ya thiki kondundu nkoka Elisa a li, Gehasi okwa kutha oompunda ndhoka mbali e te dhi fala megumbo nokwa shunitha aamati yaNaeman. 25 Sho a galukile megumbo, Elisa okwe mu pula a ti: “Owa li peni?”
Gehasi okwa yamukula a ti: “Aawe, kandi na mpo nda li, tatekulu!”
26 Ihe Elisa okwa ti: “Ou shi, omwenyo gwandje inagu ku landula, omusamane sho a londoloka metemba lye, e ku tsakaneke? Ethimbo ndika kali shi lyokutaamba iimaliwa nomizalo, iitsambe yomiolivi noyomiviinu, oonzi noongombe nenge aapika! 27 Ihe ngashingeyi oto kwaula ko uuvu waNaeman, ongoye mwene noluvalo lwoye otamu ka kala nawo sigo aluhe.”
Gehasi sho a zi po, okwa kwatwa koshilundu — olutu lwe olwa toka lwa fa omahegele gomongwa.
© Oshindonga Bible © Bible Society of Namibia, 2008.
