Omulevi noshikumbu she
1 Pethimbo ndiyaka, manga muIsrael kaamwa li omukwaniilwa, okwa li Omulevi a kala kokule kevi lyokoondundu dhaEfraim. Okwa kutha omukadhona muBetlehem shaJuda, a ninge oshikumbu she. 2 Ihe oshikumbu oshe mu geele e tashi shuna kaandjahe kuBetlehem nosha kala ko oomwedhi ne. 3 Nena omulumentu okwa tokola oku shi landula nokwa kambadhala oku shi heka, shi galukile kuye. Okwa yi ko nomupiya gwe nuusino uyali. Omukadhona okwa fala Omulevi maandjahe, nahe sho e mu mono, okwe mu taamba noku mu hambelela. 4 He okwe mu thiminike, a kale po, nokwa kala po omasiku gatatu. Omulevi nomukadhona gwe oya pakelwa po e taa lala mo. 5 Ongula yesiku etine oya meneka, ya ye. Ihe he yomukadhona okwa ti kOmulevi: “Lya utale tango. Otashi ku koleke. Opo ihe tamu vulu okuya”
6 Osho ngaaka aalumentu mboka yaali oya kuutumba e taa li e taa nu. Nena he yomukadhona okwa ti kuye: “Zimina, u lale muka e to nyanyukwa.”
7 Omulevi okwa thikama, a ye, ihe hemweno okwe mu indile noonkondo, onkee okwa lala mo natango uusiku umwe. 8 Ongula onene yesiku etitano okwa penduka, a ye, ihe he yomukadhona okwa ti: “Alikana, lya iikulya, mu ye komatango.” Osho aalumentu mbeyaka yaali oya lile pamwe.
9 Omulumentu, oshikumbu she nomupiya gwe sho ya tameke okuthikama, he okwa ti: “O, etango otali peguka; laleni ano mpaka. Otaku ka luudha mbala; kaleni mpaka, mu nyanyukwe. Ngula otamu vulu okumeneka, mu idhenge mondjila, mu ye kegumbo.”
10-11 Ihe omulumentu okwa li inaa hala okulala we nkoka, onkee yo noshikumbu she nomupiya gwe oyi idhenge mela lyondjila nuusino wawo uyali u na iithala. Olya li lya toka nokuli, sho ye ya popepi naJebus (tashi ti Jerusalem), onkee omupiya okwa ti kumwene gwe: “Omolwashike itaatu kankama, tu lale moshilando shAayebusi?”
12-13 Ihe mwene okwa ti: “Itatu kankama moshilando shaa shi shAaisraeli. Otatu pitilile po, tu tsikile kashona, tu ka laleni puGibea nenge puRama.” 14 Osho ya pitilile Jebus noya tsikile ondjila yawo. Sho ye ya muGibea moshilongo shAabenjamin, etango otali ningine nokuli. 15 Oya paguka mondjila noya lala mwiyaka. Oya yi moshilando noya kuutumba pomapindikilo, ihe kakwa li ngoka e ya taamba maandjawo uusiku mboka.
16 Manga ya li mpoka, omusamane gumwe omukulupe okwe ya pomuzimbuko gwiilonga ta zi komapya. Ye mwene ogwoshilongo shokoondundu dhaEfraim, ihe nena okwa li muGibea. (Aantu yalwe muGibea oyomezimo lyaBenjamin.) 17 Omusamane omukulupe okwa ndhindhilike omweendanandjila pomapindikilo nokwe mu pula: “Oto zi peni noto yi peni?”
18 Omulevi okwa yamukula: “Otwa yile kuBetlehem shomuJuda, nonena otu li mondjila tu uka kegumbo li li kokule moshilongo shokoondundu dhaEfraim. Kaku na ngoka e tu taamba maandjawo, tu lale mo, 19 nando ngame, mukwetu nomupiya gwandje otu na oshikwiila nomaviinu niikulya yuusino wandje. Otu na ayihe tatu yi pumbwa.”
20 Omusamane omukulupe okwa ti: “Otamu taambwa megumbo lyandje. Otandi mu sile oshimpwiyu, inamu tokelwa pomapindikilo.” 21 Okwe ya taamba maandjawo e ta palutha uusino wawo. Aayenda ye oyi iyogo koompadhi noya li uulalelo.
22 Oya li ya nyanyukwa, sho ohaluka aakongi yiipala oya zi moshilando noya kunduka egumbo e taa dhenge omweelo. Oya ti komusamane omukulupe: “Piitha mo omulumentu ngoka e ya maandjeni. Otwa hala, tu lale naye.”
23 Ihe omukulupe okwa yi pondje e ta ti kuyo: “Aawe, itashi vulika, ookuume kandje! Alikana, inamu longa iihuna yi thike mpoka! Omulumentu nguka omuyenda gwandje. 24 Taleni, oshikumbu she osho shika nomumwandje omukadhonalela. Otandi ye mu etele pondje ngashingeyi. Ningeni nayo shoka mwa hala. Ihe omulumentu inamu mu ningila iihuna yi thike mpoka.” 25 Ihe aalumentu inaye mu pulakena. Osho Omulevi okwa kutha oshikumbu she e te shi unzile pondje puyo. Oyo ye shi kutha e taa lala nasho uusiku auhe, sigo otaku shi.
26 Pepito lyetango omukiintu okwe ya e ti imbwata popepi nomweelo gwegumbo lyomusamane omukulupe, moka mwa li omulumentu gwe. Okwa kala mpoka, sigo etango tali piti. 27 Omulumentu gwe sho a penduka ongula ndjoka nokwe egulula omweelo, a ye, okwa mono oshikumbu she sha lala pomweelo gwegumbo nomaako gu uka komweelo. 28 Okwa ti: “Penduka, tu ye.” Ihe inashi yamukula sha. Okwa kambakaneke omudhimba gwasho kokasino e ta tsikile ondjila ye yu uka kegumbo.
29 Sho a thiki, okwa yi megumbo e ta kutha oshimbele. Okwa kutha omudhimba gwoshikumbu she, okwe gu tete miitopolwa omulongo niiyali e ta tumu oshitopolwa shimwe kukehe limwe lyomazimo gaIsrael omulongo nagaali. 30 Shaa ngoka e shi mono, okwa ti: “Inatu shi uva nando onale, iihuna yi thike mpaka! Iinima mbika inayi ningwa, hela Israel a tembuka muEgipiti! Otu na okuninga po sha. Oshike nee?”
© Oshindonga Bible © Bible Society of Namibia, 2008.
