Ondhimbo yaAaron
1 Omuwa okwa lombwele Moses a ti: 2 “Lombwela Aaisraeli ye ku pe oondhimbo omulongo nambali, ondhimbo yimwe oyomuwiliki mezimo kehe. Kondhimbo kehe nyola ko edhina lyamwene gwayo, 3 nedhina lyaAaron li nyola kondhimbo ndjoka yi lile po Aalevi. Otaku ka kala ondhimbo yimwe yomuwiliki mezimo kehe. 4 Dhi fala metsalihangano e to dhi tula komeho goshikethahangano, nkoka tandi ku tsakaneke. 5 Ondhimbo yomuntu ngoka nda hogolola, otayi tutuma. Pahedhi ndjika otandi mweneke omangungutulo gAaisraeli, sho haye ku tamanekele ndje.”
6 Moses okwe shi lombwele Aaisraeli, nomuwiliki gwezimo kehe mokati kawo okwe mu pe ondhimbo yimwe, adhihe kumwe omulongo nambali pamwe nondhimbo yaAaron. 7 Moses okwa tula oondhimbo adhihe metsalihangano komeho goshikethahangano shOmuwa.
8 Esiku lyanofu Moses sho a yi mo metsalihangano, okwa mono ondhimbo yaAaron, ndjoka ya kalele po ezimo lyaLevi, ya tutuma. Oya tsapuka noya sheneka oongala noyi ima oomandeli dho oloya. 9 Moses okwa kutha ko oondhimbo adhihe e te dhi ulukile Aaisraeli. Oya mono shoka sha ningwa po, nomuwiliki kehe okwa taamba ondhimbo ye. 10 Omuwa okwa lombwele Moses a ti: “Shuna ondhimbo yaAaron komeho goshikethahangano. Oyi na okupungulwa, yi kale elondodho kAaisraeli mboka ye na omangungutulo, opo yaa se.” 11 Moses okwa ningi, ngaashi Omuwa e mu lombwele. 12 Aaisraeli oya lombwele Moses ya ti: “Tala, otatu hulu po, tse atuhe tatu ka kana! 13 Shaa ngoka ta hedha ketsalihangano, ota si. Otwa uthilwa ano, tu se po atuhetuhe?”
© Oshindonga Bible © Bible Society of Namibia, 2008.
