1 Osho ngeyi ithaneni Aaisraeli ooyakweni “Oshigwana shaKalunga” na “Aaholike yOmuwa”.
Gomer ke shi kwiinekelwa — Israel ke shi kwiinekelwa
2 Aana yandje, tamanekeni nyoko — nando ke shi we mukadhandje, nangame kandi shi we omulume. Mu tamanekeni, a hulithe uuholume noluhondelo lwe. 3 Ngele ite shi ningi, otandi ke mu hula, a kale omudhu ongesiku ndiyaka a valwa. Otandi ke mu ninga, a kale a fa evi ekukutu lya mbugala e ta ka sa kenota. 4-5 Oyana itandi ya sile ohenda; oyo aana yohonda kaayi na honi. Oyo tayi ti: “Otandi yi kaaholi yandje — otaa pe ndje iikulya nomeya, omafufu goonzi niilugu, omagadhi nomaviinu.” 6 Onkee ano, tala, ondjila yayo tandi yi thitikitha omano, tandi gumbile enkolo komeho gayo yaa mone omapola gayo. 7 Otayi ka matukila kaaholi yayo, ihe itayi ke ya adha. Otayi ke ya konga, ihe itayi ke ya mona. Nena otayi ka tya: “Ote shuna komusamane gwandje — puye onda li omuhwepo ndi vule sho ndi li ngashingeyi.”
8 Ina tseya nande kutya ongame handi mu pe iilya, omaviinu nomagadhi niisiliveli ayihe noshingoli mbyoka ha yambele Baal. 9 Pethimbo lyeteyo otii ka kutha po omagano gandje giilya nogomaviinu notii ka kutha po omafufu goonzi niilugu mbyoka nde mu pele, a mone omizalo. 10 Otandi ke mu hula montaneho yaaholi ye, nokape na ngoka ta vulu oku mu kutha miikaha yandje. 11 Iituthi ye ayihe otandi yi hulitha po — iituthi ye yokomumvo noyokomwedhi nokudhana Esabati — omalongelokalunga ge agehe. 12 Otandi ka hanagula po omiviinu dhe nomikwiyu dhe ndhoka ta ti, okwe dhi pewa kaaholi ye, e ya yakule. Iitsambe ye yoomviinu noyiiyimati otandi ke yi mbugaleka; iithitukuti otayi ke yi thekeka po. 13 Otandi ke mu geelela omathimbo ngoka a dhimbwa ndje, sho a lungunithile Baal omatsininondjambo nokwiizaleka uuwe, a ka lambalale aaholi ye. Omuwa osho ta ti.
Ohole yOmuwa okuhola oshigwana she
14 Onkee otandi ke mu shunitha natango kombuga; nkwiyaka otandi ke mu sinda noohapu dhomaheko gohole. 15 Otandi ke mu shunina iitsambe ye yomiviinu mbyo a li nayo nale, nEsilu lyomalwa otali ningi osheelo shetegameno. Nkwiyaka ota ka vulika, ngashi a li sho a li omugundjuka, sho a tembuka muEgipiti. 16 Nena ota ka tya ndje ongame omulume — ite ki ithana ndje we Baal gwe. 17 Itandi ke mu etha we, a tumbule edhina lyaBaal.
18 Pethimbo ndyoka otandi ka dhika ehangano niithitukuti ayihe noondhila adhihe, opo yaa ehameke aantu yandje. Otandi ka kutha po omauta giita moshilongo, omagonga agehe nomatati e te kaleke aantu yandje mombili nomegameno.
19 Israel, otandi ke ku hokana;
ote kala omunashili nomwiinekelwa;
otandi ke ku hololela ohole yokolela nesilohenda;
oto ka hokanekeka ndongo aluhe.
20 Ote dhiginine euvaneko lyandje
e tii ku ningi gwandjelela,
nangoye oto ka tseya kutya ngame Omuwa.
21-22 Pethimbo ndyoka otandi ka yamukula
omagalikano goshigwana shandje Israel.
Evi otandi ke li lokithila omvula,
nevi otali ka menitha iilya nomandjembele nooholivi.
23 Otandi ki indjipaleka aantu yandje moshilongo
e tandi ya lagopaleke.
Otandi ka holola ohole yandje
kumboka nda li nda ti “Kiimuhole”,
nokumboka ya li haa ithanwa “Kamushiyandje”.
Otandi ka tya: “One aantu yandje,”
nayo otaa ka yamukula: “Ongoye Kalunga ketu.”
© Oshindonga Bible © Bible Society of Namibia, 2008.
