Johannes Omushashi ta dhipagwa
(Mrk. 6:14-29Luk. 9:7-9)1 Opethimbo tuu ndyoka Herodes, omuleli gwoshitine shoshilongo, oku uvu epopiwo lyaJesus. 2 Herodes okwa ti kaamati ye: “Nguka oJohannes Omushashi a yumuka kuusi, onkee oonkondo dha tya ngaaka otadhi longo muye.”
3 Oshoka Herodes okwa li a kwatitha Johannes nokwe mu manga e te mu tula mondholongo omolwaHerodias, omukiintu gwamumwayina Filippus. 4 Oshoka Johannes okwa lombwele Herodes: “Itashi vulika, u hokane Herodias.” 5 Herodes okwa li a hala oku mu dhipaga, ihe okwa tila aantu, oshoka oya li ya tala Johannes, oye omuhunganeki.
6 Ano mesiku lyoshituthi shokuvalwa kwaHerodes omukadhona gwaHerodias okwa tutula uudhano montaneho yaamboka ya li moshituthi. Owo nowo opalele Herodes, 7 onkee oku uvanekele omukadhona nokugana kutya ote ke mu pa kehe tuu shoka a hala.
8 Omukadhona sho a adhika a ngongoshekwa kuyina, okwa ti: “Pe ndje omutse gwaJohannes Omushashi moshiyaha shika!”
9 Omukwaniilwa okwa nika oluhodhi ihe omolwegano lye nomolwaayenda okwa lombwele, e gu pewe. 10 Opo a tumu okutetitha ko omutse gwaJohannes mondholongo. 11 Omutse gwe ogwa etwa gu li moshiyaha nogwa pewa omukadhona e te gu faalele yina. 12 Aalongwa yaJohannes oye ya noya kutha po omudhimba e taye gu fumvike. Oyo noya yi noya hokololele Jesus.
Jesus ta kutitha aalumentu omayuvi gatano
(Mrk. 6:30-44Luk. 9:10-17Joh. 6:1-14)13 Jesus sho e shi uvu, okwa zi po mpoka e li mowato nokwa yi e ki ikalele muuwike. Aantu sho ye shi uvu, oye mu landulile ko kolupadhi ya zi kiilando. 14 Ano Jesus sho e ya komunkulo, okwa mono ongundu onene yaantu nokwa li e ya uvitile olukeno e ta aludha aavu yawo.
15 Ano sho kwa ningi ongulohi, aalongwa ye oye ya kuye noya ti: “Pokuma mpaka omombuga yowala, netango olya toka. Laleka aantu, ya ye komagumbo, opo ye ki ilandele iikulya.”
16 Jesus okwa ti kuyo: “Inashi opala, ya ye ngaaka. Ya peni iikulya.”
17 Oyo ya ti kuye: “Mpaka otu na po iikwiila itano ayike noohi mbali.”
18 Jesus okwa ti: “Yi eteni nkuka kungame.” 19 Nokwa lombwele aantu, ya kuutumbe pomwiidhi. Ye okwa kutha ihe iikwiila itano noohi mbali, okwa ligamene kegulu e ta hambelele Kalunga, okwe yi pambula e te yi pe aalongwa ye, ye yi topolele aantu. 20 Aantu ayehe oya li noya kuta e taa toola iihupe yiipambu, oontungwa omulongo nambali dhu udha. 21 Mboka ya lya, aalumentu omayuvi gatano, aakiintu naanona inaa yalulwa.
Jesus te ende kombanda yomeya
(Mrk. 6:45-52Joh. 6:16-21)22 Jesus oku ulumike aalongwa, ya ye mowato, opo ye mu tetekele komunkulo gwahandiyaka yefuta, manga ye ta laleke aantu. 23 Sho e ya laleke, okwa londo kondundu oye awike, opo a galikane. Oye okwa kala ko awike sigo ongulohi. 24 Ihe owato oya adhika mefuta kokule nomunkulo noya monithwa iihuna komakuthikuthi, oshoka ombepo oye yi dhenge moshipala.
25 Pethimbo lyokoongulasha Jesus okwe ya kuyo te ende kombanda yomeya. 26 Ano aalongwa sho ye mu mono te ende kombanda yomeya, oya haluka e taa kugu mokule kuumbanda ya ti: “Oshiluli sho!”
27 Mbalambala Jesus okwe ya popitha e ta ti: “Ikoleleni, inamu tila, ongame.”
28 Petrus okwa ti kuJesus: “Omuwa, ngele ongoye, lombwela ndje, ndi ye kungoye tandi ende kombanda yomeya.”
29 Jesus okwa ti kuye: “Ila.” Petrus okwa zi mowato e te ya kuJesus te ende kombanda yomeya. 30 Ihe sho a mono ombepo yoshikungulu, okwa haluka nokwa tameke okuningina mo. Oye okwi igidha: “Omuwa, hupitha ndje!”
31 Jesus okwa ganeke mbala oshikaha she nokwe mu kwata e ta ti kuye: “Mwiitaali ngoye omunkundi, omolwashike wa limbililwa?”
32 Ano sho ya yi mowato, ombepo oya kodha. 33 Ihe mboka ya li mowato, oya tsu oongolo koshipala she e taa ti: “Oshili ngoye Omuna gwaKalunga.”
Jesus ta aludha aavu muGenesaret
(Mrk. 6:3-56)34 Oyo ya taagulukile handiyaka yetale noye ya kevi lyaGenesaret. 35 Ano aantu yaankoka sho ye mu dhimbulula, oya tumu elaka muushiinda, aavu ayehe noye etwa kuye. 36 Oyo yi indile Jesus, a pitike, aavu ya gume nando okoongenge dhonguwo ye. Ayehe mboka ye yi gumu, oya aluka.
© Oshindonga Bible © Bible Society of Namibia, 2008.
