OMAYELETUMBULO 8 - Oshindonga Bible (ONDB)

Iiyimati yowino

1 Owino itayi igidha nani? Nenge uunongo itau kololoka pombanda? 2 Koondungu dhoondundu dhopondjila nopoompagiila dhoondjila tau thikama. 3 Koombinga dhiiyelo, peelo lyoshilando, poombululu dhomiyelo tau kugagana mokule:

4 “Aalumentu ne, one tandi ithana, newi lyandje tandi li yeluthile aana yaantu. 5 Aantu ne yanathangwa, ilongeni okupikula omayele, nane omagoya, ilongeni okuuva ko oondunge. 6 Pulakeneni, oshoka tandi popi iinima yolela, nomilungu dhandje tadhi ekamene uuyuuki. 7 Oshoka ondaathelo yandje tayi popi oshili, nuukeenakalunga owo iihuna komilungu dhandje. 8 Oohapu adhihe dhomokana kandje odhu uka, mudho kamu na iifundja nomakoto gasha. 9 Adhihe otadhi yelele omunandunge, notadhi ukitha mboka ya likola ontseyo. 10 Taambeni omapukululo gandje, hashisiliveli, hogololeni uunongo komeho goshingoli sho shene. 11 Oshoka owino oyi vule oshimona, nokaku na uulenga tau yelekwa nayo.

12 “Ngame, Owino, omwiinekelwa momayele nondi na ontseyo neuveko lyu uka. 13 EtiloKalunga olyo okutonda uuwinayi; ondi tonde uuntsa nuuntseyele, oondjenda oombwinayi nokana koluhoko. 14 Omayele nepukululo olyandje; ondi na oondunge noonkondo. 15 Koonkondo dhandje aakwaniilwa taa pangele, naaleli taa tula po omautho. 16 Koonkondo dhandje aaniikandjo otaa lele, noomvalekele naatokolihapu ayehe yevi. 17 Ondi hole mboka ye hole ndje, naamboka taa kongo ndje, otaa ka mona ndje. 18 Pungame ope na uuyamba nesimano, omaliko nuuyuuki. 19 Oshiyimati shandje oshiwanawa shi vule oshingoli sha yelithwa, iiyetwapo yandje oyi vule oshisiliveli sha hogololwa. 20 Otandi katukile mondjila yuuyuuki nomokati komapola guuyuuki, 21 opo ndi thigululithe aaholike yandje omaliko, noompungulilo dhawo tandi dhi udhitha.”

Owino oya za konalenale

22 “Omuwa okwa shiti ndje omutango gwiilonga ye, okuza konalenale. 23 Ondu umbwa nalenale muukwaaluhe, okuza ketameko, okuza komathimbo gaaluhe, evi manga inaali shitwa. 24 Omafuta manga inaaga holoka, oko nda li nale; nda valwa, manga kwa li kaaku na oothithiya dhi na omeya omanene. 25 Oko nda li, oondundu manga inaadhi dhikwa nomanga iikulundundu inaayi valwa, 26 manga inaa shita evi, nomalundu nenge okandhulumutu kevi nokuli. 27 Oko nda li nale, sho a yala egulu, sho a yalaleke ombanda yomeya momafuta. 28 Sho a dhike iikogo mookathele nokwa koleke oothithiya dhomeya mookandoli, 29 sho u uthile omafuta oongamba dhago, opo omeya gaa taaguluke omalombwelo ge, sho a dhike omakankameno gevi, 30 oko nda li nale nda fa engomba nda tegama naye, onde mu nyanyudha esiku nesiku, naaluhe nda dhanene koshipala she, 31 nokudhanena kombanda yongonga yevi lye, nenyanyu lyandje olya li okunyanyukilwa aana yaantu.

32 “One aamati, pulakenii ndje. Aanelago oyo mboka haa dhiginine omapola gandje. 33 Pulakeneni omagando, mu pukuluke, ne inamu ga ekelahi. 34 Omunelago oye tuu ngoka ta pulakene ndje, oongoka ha tonatele esiku nesiku pomiyelo dhandje noha langele iikulo yomiyelo dhandje. 35 Oshoka ngoka ta mono ndje, ota likola omwenyo nOmuwa ota ka hokwa okukala pamwe naye. 36 Ihe ngoka ta hunutha ndje, ota ningi omwenyo gwe mwene oshege; ayehe mboka taa tondo ndje, oye hole eso.”