Jeremia taa tompathana naHanania
1 Omumvo tuu ngoka momwedhi omutitano gwomumvo omutine Sedekia sho a li omukwaniilwa, Hanania yaAssur, omuhunganeki gwokomukunda Gibeon, okwa lombwele ndje motempeli montaneho yaayambi noyaantu ayehe a popi 2 kutya Omuwa Omunankondoawike, Kalunga kaIsrael, okwa ti: “Onda teya po oonkondo dhomukwaniilwa gwaBabilonia. 3 Momimvo mbali otandi ka galulila iikwaniipangitho yotempeli ayihe mbyoka Nebukadnezzar, omukwaniilwa gwaBabilonia, e yi fala kuBabilonia. 4 Otandi ka galula wo omukwaniilwa gwaJuda Jehoiakin yaJehoiakim pamwe nAajuda ayehe mboka ya yi muupongekwa kuBabilonia. Eeno, oonkondo dhomukwaniilwa gwaBabilonia otandi dhi teya po. Ongame, Omuwa, nda popi.”
5 Ngame onda lombwele Hanania montaneho yaayambi noyaantu ayehe mboka ya li motempeli nda ti: 6 “Amen! Omuwa ne shi ninge! Na tsakanithe shoka wa hunganeke, nota ka galula ko kuBabilonia iikwaniipangitho yotempeli naantu ayehe ya falwa muupongekwa. 7 Ihe pulakena shoka tandi ku lombwele ngoye noshigwana ashihe. 8 Aahunganeki mboka ya hunganeke nale, komeho getu, oya hunganeke kutya iita, ondjala nelega tali adha iigwana oyindji niilongo iinankondo. 9 Ihe omuhunganeki ngoka ta hunganeke ombili, ota dhimbululwa kutya ye omuhunganeki ngoka a tumwa shili kOmuwa, uuna ehunganeko lye lya tsu.”
10 Hanania okwa kutulula ndje ondjoko e te yi teya po, 11 e ta popi montaneho yaantu ayehe ta ti: “Omuwa okwa ti, osho ngeyi ta ka teya po ondjoko yomukwaniilwa Nebukadnezzar ya kutilwa koothingo dhiigwana ayihe; note shi ningi momimvo mbali.” Ngame nonda zi po.
12 Konima yaambika Omuwa okwa lombwele ndje, 13 ndi ka lombwele Hanania ndi tye: “Omuwa ota ti, owa vulu okuteya po ondjoko yoshiti, ihe ye ote ke yi pingakanitha nondjoko yosheela. 14 Omuwa Omunankondoawike, Kalunga kaIsrael, ota ti, ye ota ka kutila iigwana ayihe ondjoko yosheela, niigwana otayi ka longela omukwaniilwa gwaBabilonia Nebukadnezzar. Niiyamakuti otayi ka longela Nebukadnezzar.”
15 Onda lombwele Hanania nda ti: “Pulakena, Hanania! Omuwa ine ku tuma nando, oto itaalitha aantu mbaka iilombo. 16 Onkee ano Omuwa mwene ta popi kutya ote ku kombo po. Omumvo nguka manga inaagu poka, oto ka sa, oshoka owa lombwele aantu ya tse ondumbo nOmuwa.”
17 Hanania nokwa si momwedhi omutiheyali gwomumvo ngoka.
© Oshindonga Bible © Bible Society of Namibia, 2008.
