Omuwa ta yamukula Job
1 Nena Omuwa okwa yamukula Job moshikungulu.
2 Ongoye lye to pilaaleke omayele gandje
noohapu dhaa na oondunge?
3 Ilongekidha ngaashi omulumentu,
u yamukule omapulo gandje.
4 Owa li peni, sho nda shiti uuyuni?
Lombwela ndje, ngele ou na ontseyo yasha.
5 Olye a tokola uunene wawo?
Olye e u yeleke nondjelekongodhi?
6 Evi olya thikamekwa po koshike?
Olye a dhike omakankameno galyo?
7 Esiku ndiyaka oonyothi dhongula odhi imbi,
naayengeli oya ligola kenyanyu.
8 Olye e edhile po iiyelo yefuta,
uuna omeya ga pimpuka mo mela lyayina?
9 Ongame nda siikile efuta niikogo
nonde li gonyene momilema omiluudhe.
10 Onde li ningile oongamba
nonde li kaleke handiya yomiyelo dha patekeka.
11 Onde li lombwele nda ti:
“Opo to hulile mpa! Omakuthikuthi goye opo taga hulile mpa.”
12 Job, mokukalamwenyo kwoye owa lombwelele uusiku u she?
13 Owa vulile okulombwela eluwa li tende
nokutukulutha mo aalunde momaholameno gawo?
14 Uuyelele wetango otau minikile iikulundundu nomasilu gevi
ngaashi omagonyoto moonguwo
nenge omandhindhiliko moshihotekitho.
15 Aalunde otaa togwa kuuyelele walyo
notau ya keelele kiilonga yuukolokoshi.
16 Owa yile sigo okoonza dhefuta
nenge u adhe sigo okondaandelo yalyo?
17 Owu ulukilwa omiyelo dhokuusi
nenge u entamene momilema omiluudhe thokothoko?
18 Owa tseya uuyuni mpo u thike?
Lombwela ndje, ngele owa tseya ayihe mbika.
19 Ondjila yokuya kaandjawo yuuyelele ou yi shi,
nenge kaandjawo yomilema owa tseya ko?
20 Oto vulu tuu okweenditha uuyelele
nokugalula omilema?
21 Eeno, oto shi vulu, oshoka ngoye omuntu gwonale,
noomvula dhoye odhindjidhindji.
22 Owe enda tuu maandjawo yuutalala,
nenge u tale mompungulilo yoompawe?
23 Mbika onde yi pungulile omathimbo guudhigu,
oongoka goontamanana nogiita.
24 Owa talela po ehala mpo etango hali piti,
naampo ombepo yokuuzilo hayi ziilile?
25 Oku na tuu ngo a vulu okupalela omvula oompompolonga
nenge okuwilika omityalakata?
26 Oku na tuu omuntu a lokithile omvula moshilongo shaa na aantu,
nenge mombuga yowalawala?
27 Olye ta vulu okututika ombuga nomalondo
nokumenithila mo omwiidhi omutalala?
28 Omvula oyi na he,
olye a gwitha omume?
29 Olye yina yiikangwa noyombambi?
30 Omeya otaga kukuta ga fa emanya
notaga hekele kombanda yefuta.
31 Omanyuku oto vulu oku ga mangela kumwe?
Oto vulu okumangulula Okalimbanombwa?
32 Oto vulu okuholokitha po Ekaladhidhi pomathimbo galyo
nokweenditha Hungilila noyana?
33 Oompango dhomewangandjo ou dhi shi,
nenge oto vulu oku dhi longitha kombanda yevi?
34 Iikogo otayi vulika tuu kelombwelo lyoye,
e tayi tameke okuloka?
35 Oto vulu okulombwela oombadhi dhi adhime?
Dhi tye ando: “Otwa longo, ngaashi we tu lombwele.”
36 Olye a pe iikogo oondunge,
newangandjo olye e li nongeke uunongo?
37 Olye e na oondunge dha gwana okuyalula iikogo?
Olye ta pimpi iiyuma yokegulu, yi pooke omvula?
38 Omvula nge ya loko,
evi otali mbandele.
39 Oto vulu tuu okukwatela oonime iihakanwa yadho,
nenge u kutithe oonime oongundjuka,
40 ngele tadhi holama momakololo,
nenge tadhi lala dha langela moomvugo dhadho?
41 Olye ha palutha omadhilakola,
uuna taga tuka ga sa ondjala,
nuuna uumwana tau ithana ndje
notau pula ndje iikulya?
© Oshindonga Bible © Bible Society of Namibia, 2008.
