1 Vo eshi va twala mo oshikefa shaKalunga ndele ve shi nangeka metwali olo David e li shi dikila, ova yamba omaxwikiloyambo nomapanduloyambo koshipala shaKalunga. 2 David eshi a yamba omaxwikiloyambo nomapanduloyambo, okwa nangeka noupuna ovanhu medina lOmwene. 3 Nokwa tukulila Omuisraeli keshe, ovalumenhu novakainhu, keshe umwe, omungome nonhumba yombelela noshikamena sheeviinyu. 4 Ndele mOvalevi okwa tula po ovayakuli, hava yakula moipafi yoshikefa shOmwene, va fimaneke Omwene Kalunga kaIsrael noku mu hambelela noku mu pandula: 5 Asaf, omukulunhu, naSakaria e mu shikula metumbalo; Jeiel naSemiramot naJehiel naMatitia naEliab naBenaja naObed-Edom naJeiel ve neenyalilo nouxumbafeta, fimbo Asaf e nenghuma 6 novapristeli Benaja naJahasiel va shika omanghuma oshikushu efimbo alishe moipafi yoshikefa shehangano laKalunga.
Epsalome laDavid
(Eps. 105)7 Mefiku tuu olo, David okwa tula po Asaf noovakwao otetetete, va imbe ehambelelo kOmwene:
8 Hambeleleni Omwene, ifaneni edina laye.
Hepaululeni oinenelonga yaye mokati koiwana yoilongo.
9 Mu imbileni mu shikileni,
udifeni oikumwifalonga yaye aishe.
10 Tumbalekeni edina laye liyapuki.
Ava tava kongo Omwene,
omutima wavo nau kale wa hafa.
11 Lipuleni nOmwene neenghono daye,
efimbo alishe kongeni oshipala shaye!
12 Dimbulukweni oikumwifa oyo e i longa,
nomadidilikokumwifa aye nomatokolo okanya kaye,
13 oludalo nye laAbraham, omupiya waye,
ovana vaJakob, ovahoololwa vaye!
14 Omwene Oye Kalunga ketu;
omatokolo aye otaa udika mounyuni aushe.
15 Diladileni alushe ehangano laye,
neendjovo daye edi a dikila omaludalo omayovi,
16 ehangano olo e li udafanene naAbraham,
neano, olo e li anenene Isak,
17 olo e li pamekelele Jakob, li kale omhangela yaye
nehangano laye naIsrael fiyo alushe,
18 eshi a tile: “Edu laKaanan, ohandi li ku pe,
lo li kale oshitukulwafyuululwa sheni.”
19 Vo eshi va li okangudu kanini,
ke vahapu nande, ndele va li mo ovanailongo,
20 ovatembavaukili koshiwana noshiwana,
koshilongo noshilongo.
21 Ndelenee Ye ina efa nande umwe e va fininike,
nokwa li a handukila eehamba omolwavo, ndele ta ti:
22 “Inamu kuma nande ovavaekwa vange,
nye inamu hepeka ovaxunganeki vange.”
23 Imbileni efimano lOmwene ounyuni aushe.
Udifeni exupifo laye efiku nefiku!
24 Efimano laye li hepaululeni mokati koiwana,
noikumwifa yaye moiwana aishe.
25 Osheshi Omwene Ye omunene nomuhambelelwa pombada,
Ye ota tilika kombada yoikalunga aishe.
26 Osheshi oikalunga aishe yoiwana oyo oikalunga.
Ndelenee Omwene okwa shita omaulu.
27 Epangelonghono noshinge shi li koshipala shaye,
eenghono nehafo tali kala monhele yokukala kwaye.
28 Fimanekeni Omwene, nye omapata oiwana,
peni Omwene efimano neenghono.
29 Peni Omwene efimano ledina laye, eteni omayambo,
mu holoke koshipala shaye,
linyongameneni Omwene mwa djala oikutu iyapuki.
30 Kakama koshipala shaye, ounyuni aushe.
Ongonga yedu oya pama, onghee itai tengauka.
31 Omaulu naa hafe nedu nali nyakukwe,
nava tye mokati koiwana: “Omwene Oye ohamba.”
32 Efuta naashishe shi li mo, nashi tukuluke,
nomufitu naashishe shi li mo nashi kuwilile.
33 Opo nee omiti domoixwa nadi shambukwe koshipala shOmwene.
Osheshi Ye ote uya okutokola ounyuni.
34 Hambeleleni Omwene, osheshi Oye omuwa,
ouwanghenda waye tau kala po fiyo alushe.
35 Tyeni: “Kalunga kexupifo letu, tu xupifa;
tu ongela u tu xupife mo moiwana,
opo tu hambelele edina loye liyapuki,
noku li tanga molwefimano loye.
36 Omwene, Kalunga kaIsrael na hambelelwe
alushe fiyo alushe.”
Novanhu aveshe tava ti: “Amen!” nova hambelela Omwene.
37 Ohamba David oya tula po Asaf novakwao va kale ofika komesho yoshikefa shehangano lOmwene, va longe komesho yoshikefa efimbo alishe oilonga yefiku keshe. 38 Nosho yo Obed-Edom pamwe navakwao omilongo hamano navahetatu, ndele Obed-Edom yaJedutun naHosa va ninga ovanangeli voivelo. 39 Ndelenee omupristeli Sadok pamwe novapristeli vakwao e va tula komesho yetwali lOmwene koshikulundu shomuGibeon, 40 va yambele Omwene koaltari ongula nonguloshi omaxwikiloyambo, ndele ve shi ninga paashishe sha shangelwa momhango yOmwene, e i lombwela Ovaisraeli; 41 ndele pamwe navo Heman naJedutun novahoololwa vamwe ovo va tumbulwa pamadina va hambelele Omwene nokutya, ouwanghenda waye tau kala fiyo alushe. 42 Ndele Heman naJedutun va diinina omanghuma noushandje vovashiki nouxumba vamwe molwomalwiimbo okufimaneka Kalunga. Ndelenee ovana ovamati vaJedutun va li poshivelo. 43 Novanhu aveshe, keshe umwe, eshi a shuna keumbo laye, David okwa piluka, a ka nangeke noupuna eumbo laye.
© Oshikwanyama Bible Revised © Bible Society of Namibia, 2008, 2012.
