Oshilando shaRabba tashi hanaunwa po
1 Nomudo umwe eshi wa pita, pefimbo olo eehamba tadi fikama okuhomona, Joab okwa twala omatanga ovakwaita ndele ta hanauna po oshilongo shovana vaAmmoni. Nokwe uya yo kuRabba ndele te shi kondeke, fimbo David a kala muJerusalem. Ndele Joab okwa nangala Rabba, ndele e shi hanauna po. 2 Ndele David okwa kufa oshishani shohamba yavo komutwe waMilkom, oudjuu woshishani wa li eekilograma omilongo nhatu nanhee doshingoldo, ndele mwoo mwa li okamanya ke nondilo, ndele owo wa tulwa komutwe waDavid. Nokwa kufa mo moshilando oixuulwa ihapu. 3 Noonakukalamo musho okwe va kufa mo nokwe va tula moilonga yoishaaxa, yeembike noyomapanda. Ndele osho David a ninga oilando aishe yOvaammoni. Ndele David okwa shuna nomatanga aeshe ovakwaita kuJerusalem.
Ovafilisti tava tewa lutatu
4 Ndele konima yoinima ei, olwoodi la hovela nOvafilisti puGeser. Opo nee Sibbegai, Omuhusai, okwa dipaa Sippai womovana vOvarefai, ndele osho va ninipikwa. 5 Ndele pa li vali oita nOvafilisti. Ndele Elhanan yaJair okwa dipaa Lakmi, omumwaina waGoliat, ou Omugat, ou oshiti sheonga laye sha li ngaashi ongala yomushi. 6 Ndele pa li vali olwoodi puGat, ndele oko kwa li omulumenhu mule unene e nominwe hamano meke keshe nomomhadi keshe, kumwe ominwe omilongo mbali nanhee. Naye yo okwa li womoludalo lOvarefai. 7 Nokwa sheka Ovaisraeli, ndelenee Jonatan yaSimea, omumwaina waDavid, okwe mu dipaa. 8 Vo va li vomoludalo lOvarefai omuGat, ndele va dipawa keke laDavid nokomake ovapiya vaye.
© Oshikwanyama Bible Revised © Bible Society of Namibia, 2008, 2012.
