Eudifo laJona Elidilululo lOvaninive
1 Ndele ondjovo yOmwene oye uya lutivali kuJona, ndele tai ti: 2 “Fikama, u ye kuNinive, oshilando shinene, ove u udife ko eudifo eli handi li ku lombwele.” 3 Opo Jona a fikama, ndele ta i kuNinive ngaashi a lombwelwa kOmwene. Ndele Ninive osha li oshilando shinene unene, otashi taululwa omafiku atatu. 4 Ndele Jona okwa ya moshilando ndele ta ende mo efiku limwe, ndele ta udifa, ta ti: “Omafiku omilongo ine aeke, opo Ninive tashi hanaunwa po!” 5 Ndele Ovaninive ova itavela Kalunga, va ingida efiku lelidiliko, ndele ovakulunhu nounona va djala eeshako. 6 Ndele ondaka eshi ya hanga ohamba yomuNinive, oyo ya fikama kolukalwapangelo layo, oye lidula oshikutu shayo, ndele ya djala oshako noya kala omutumba momute. 7 Ndele yo ya vilikilifila muNinive, ndele tai ti: “Ondaka yohamba noyomalenga ayo tai ti: paha kale nande omunhu ta li sha ile oshinamwenyo, eengobe ile eedi noikombo tai lifwa ile tai xwiilwa. 8 Ndelenee ovanhu noimuna nai dikwe eeshako, oyo nai ifane shili Kalunga, ndele keshe umwe na aluke kondjila yaye ii nokoulunde ou wa kanyatela momake aye. 9 Kashiimba Kalunga ota ka efa ehandu laye nokulidilulula, opo Ye te lialuluka kexwamo lehandu laye ndele fye itatu nyonauka.” 10 Ndele Kalunga okwa mona oilonga yavo, nokutya vo ova aluka kondjila yavo ii. Opo nee Kalunga e lialuluka komupya ou Ye e u tile e u va ningile, ndele Ye ine shi ninga.