Ekemo molwehanauno lotembeli
Ounongoimbilo waAsaf.
1 Akutu Kalunga, oshike we tu ekelelashi fiyo alushe,
needi doufita woye, oshike we di fulila onya?
2 Dimbulukwa eongalo loye, eli we liongelela nalenale,
nowe li likulilila, li kale epata loyelela.
Dimbulukwa omhunda yaSion,
ei ho kala kombada yayo.
3 Yukifa omanha oye koikuluputu yonale;
akutu, omutondi okwa pulungusha po
oinima aishe yomouyapuki.
4 Ovatondi voye otava ulile
meni longulu yoye yokwoongalela;
ova dika mo oiulikilifo yokumonikifa efindano lavo.
5 Opa fa omufitu, ou ovanhu ve u yedela omakuva,
ndele tave u tetaula po.
6 Ndele paife ve li po tava xwandaula yo
oihongwa yayo aishe youlenga nomakuva neendjudo.
7 Ouyapuki woye ove u xwika po,
onhele yedina loye ove i nyateka nai
fiyo okomukangha.
8 Momitima davo ova tya:
“Tu va nyonauneni po shimwe.”
Opo nee eengulu adishe dokwoongalela
ove di xwika po moshilongo ashishe.
9 Oiulikilifo yetu iyapuki itatu i mono vali;
kape na vali omuxunganeki,
ndele mufye kamu na umwe
ta shiiva nokutya, fiyo onaini.
10 Akutu Kalunga, fiyo onaini hano to efa
omunafundo e tu sheke,
nomutondi a kale ta sheke edina loye?
11 Molwashike mbela to alula eke loye?
Ahowe, nana olulyo loye monghwapa,
u va nyonaune po.
12 Kalunga, Oove ohamba yange yonale, nghee nda dja;
oshilonga shexupifo oho shi longo kombada yedu.
13 Meenghono doye owa li wa tukula efuta pokati,
nomitwe deengadu owe di nyanyaulila kombada yomeva.
14 Oove ou, wa tetaulile omitwe daLeviatan,
ndele to di pe oifitukuti yomofuka, di liwe po.
15 Oove ou, wa fulukifile eedjo nomilola, nomilonga,
edi da li da tondoka omeva nale, owe di pwiininifa.
16 Omutenya owoye noufiku owoye,
Oove ou, wa tula ko omaminikilo keulu.
17 Oove ou, wa pangelela edu eengaba, di li dingilile;
okwenye nokulombo nokufu,
Oove omushiti wayo.
18 Omwene, shi dimbulukwa,
omutondi eshi te ku sheke,
oshiwana sha laipala, otashi dini edina loye.
19 Omwenyo wonghuti yoye ino u efela koilyani,
oukalimwenyo wovakwanaluhepo voye
ino u dimbwa fiyo alushe.
20 Dimbulukwa ehangano letu nanye!
Osheshi oikololo yoshilongo
oiyadi eenhele doumbudi.
21 Ino efa omufininikwa a dje po a limbililwa;
eehepele nomapongo nava tange edina loye.
22 Akutu Kalunga, fikama,
kondjela oshikondjelwa shoye!
Didilika omasheko, eshi to shekwa
kovapwidi keshe efiku.
23 Ove ino dimbwa omauyaano ovatondi voye,
nomakolokoto ovakondjifi voye aa itaa dimbuka.
© Oshikwanyama Bible Revised © Bible Society of Namibia, 2008, 2012.
