Ehanauko laBabilon tali xunganekwa
1 Exunganeko, Jesaja yaAmos e li mona okuxunganekela Babilon. 2 Dikeni epandela koxulo yomhunda ihe na sha; va lalekideni pombada, va lapeni neke, nave uye, va pitile moivelo yovanenenhu. 3 Ame mwene onda lombwela ovayapulwa vange, nda ifana ovaladi vange va wanife oshilonga shehandu lange ovalinenepeki mefimano lange, ava hava hafe pombada. 4 Pwilikina, eweelelokolokoto tali udika keemhunda ngaashi ovanhu vahapu unene; pwilikina, eweelelo lepiyaano lomauhamba noloiwana ya ongala: Omwene Kalunga komatanga ovakwaita ta tale omatanga ovakwaita melilongekido lavo loita. 5 Ovo tava di kedu lokokule, okominghulo deulu, Omwene noilongifo youpyuhandu waye yokuhanauna po edu alishe. 6 Lileni pombada, osheshi efiku lOmwene oli li popepi, otali uya ngaashi ehanauno tali di komunaenghono adishe. 7 Onghee hano omaoko aeshe otaa fi ounye nomutima womutima womunhu keshe otau hemuka, 8 ndele vo ova haluka, oudu wodila nouyehame tau va hange, tave litonyo ngaashi omudali, tava talafana omesho manene, noipala yavo oya xwama ngaashi omundilo. 9 Tala, efiku lOmwene otali uya nokuli li noixunahalukifo noupyuhandu nehandu la hanya li shitukife edu omaputu noli kombe po ovalunde aveshe filufilu. 10 Osheshi eenyofi dokeulu neenyofi daOrion daye itadi yela vali nokuminikila, netango otali laula mokupita kwalo, nohani itai yandje vali ouyelele wayo. 11 Ndele onda hala okuhandukila ounyuni molwowii wao nokukongolola oulunde wovadinikalunga; nounhwa woonakuholounhwa ohandi u mane po, ndele ohandi ninipike elinenepeko lovakolokoshi. 12 Ndele ovanhu ohandi va ningi vanini ve dulike koshingoldo sha koshoka, novanhu ve dulike koshingoldo shaOfir. 13 Onghee hano ohandi ka kakamifa eulu, nedu otali ka lunduluka ponhele yalo netengauko okoupyuhandu wOmwene Kalunga komatanga ovakwaita mefiku lehandu laye la xwama. 14 Ndele ngaashi omenye ya tilifwa, nongaashi eedi dihe na omufita te di kelele, osho aveshe tava ka pungulukila kovanhu vavo, keshe umwe ta ka yuka kedu laye. 15 Keshe umwe ta hangika ota tyulwa nakeshe ou ta kwatwa ota fi keongamukonda. 16 Ndele ounona vavo vanini otava nyanyaulwa moipafi yavo, nomaumbo avo taa tinhwa po, novakainhu vavo otava haelwa. 17 Tala, ohandi va pendulile Ovamedia, ava hava dini oshisiliveli noinava hokwa oshingoldo. 18 Ndelenee omauta otaa tetaula ovamati, ndele vo itava ka fila onghenda ounona vomomadimo noitava file ounona onghenda. 19 Heeno, osho Babilon, oulenga woilongo netumbalo lOvakaldea, otashi ka ningwa ngaashi Kalunga a ninga eshi a hanauna po Sodom naGomorra. 20 Fiyo alushe ovanhu itava kala ko vali; nokepupi fiyo okepupi itapa kala vali eenhele dovanhu. NOmuarabi ita dikile mo nande etwali, novafita itava ombifile mo vali oimuna yavo. 21 Ndelenee oifitukuti yomofuka tai ka tulumukilwa mo, nomaumbo avo otaa ka kala e yadi omaxuvi, eemho omo tadi kala, noilulu otai danaukile mo. 22 Ndele oimbungu tai ka kwenena meembala dayo da wapala, nouvandje otava ka kala meenguluhafo douhamba. Ndele efimbo lasho oli li pokufika, nomafiku asho itaa ehene ko vali.
© Oshikwanyama Bible Revised © Bible Society of Namibia, 2008, 2012.
