Enyamukulo lOmwene
1 Ame onda hala okuya konhele yange yenangelo, ndi kale kohotekuma, ndele nda hala ndi mone osho te shi lombwele nge, naasho nde shi nyamukulwa mokukema kwange. 2 Opo nee Omwene okwa nyamukula nge, ndele ta ti: “Emoniko li shanga, ove u li nyolele moipelende yelova, li shiive okuleshwa noupu, 3 osheshi emoniko tali ka teelela efimbo la nunwa. Ndelenee ohali endelele kefikilo lalo, lo itali ka puka. Nongeenge ola kala ko, li teelela. Osheshi olo tali ka fika shili, lo itali kala ko.
4 “Tala, omwenyo waye we linenepeka noinau yuka. Ndelenee omuyuki ta ka kala e nomwenyo keitavelo laye. 5 Navali: Omaviinyu hae mu kengelele. Omulumenhu omulinenepeki ita kala po. Oye ou ha makula okanya kaye ngaashi oshovafi, nongaashi efyo itali kuta, osho ye e li. Ye ote liongelele oiwana aishe, novanhu aveshe ote ve lishilile.” 6 Vo aveshe itave ke mu ningila eyeletumbulo neimbilosheko neetumbutumbu, ndele tava ti: “Woo ou, te likongele oinima ihapu ihe fi yaye, fiyo onaini hano, ndele te litwike oshikolo shemona lombabyona.” 7 Ovahepeki voye itava ka fikama diva, naava tave ku fininike itava ka penduka? Opo ove to ningi oixuulwa yavo. 8 Osheshi ngaashi ove wa nyeka oiwana ihapu, oiwana aishe ei ya xupa ko, tai ke ku nyeka molwohonde yovanhu nomolwoukolokoshi wa ningila oshilongo noshilando noonakukalamo aveshe.
9 Woo ou, ta nyekele eumbo laye emona loulunde, opo a tungile pombada oshihadi shaye, e lixupife ye mwene meke lomupya. 10 Omapukululo oye a fifa ohoni eumbo loye, eshi wa nyonauna po oiwana ihapu, ndele we linyonena omwenyo woye. 11 Osheshi emanya lomekuma tali ingida, nomuti wonhikifo tau mu nyamukula. 12 Woo ou, ta tungu oshilando nohonde ndele ta diki ohotengulu noulunde. 13 Tala, eshi itashi di kOmwene womatanga ovakwaita, oiwana eshi hai lihepekele omundilo, novanhu otave lilolola oshimha? 14 Osheshi edu otali ka yada eshiivo lefimano lOmwene, ngaashi omeva haa tuvikile efuta.
15 Woo ou, ta nwefa omukwao, ndele ta lumbakanifa oshinuwa nehandu ndele te mu kolwifa a mone epenge laye. 16 Ove we likutifa nohoni, hanefimano. Paife naave yo nwa hano, opo okuhafukalekwa kwoye ku monike. Eholo lOmwene waye lokolulyo otali ke ku tilwa, noto fi ohoni ponhele yefimano. 17 Etinho, we li tinhififa Libanon, tali uya kombada yoye nehanauno eli la halukifa oifitukuti omolwohonde yovanhu nomolwoukolokoshi wa ningilwa oshilongo noshilando noonakukalamo aveshe.
18 Oshihongwafano sha hongwa komuhongi washo oshi nekwafo lashike? Ile oshitelekwafano omuxunganeki woipupulu, omuteleki washo eshi te shi lineekele, ndele ta ningi oikalunga ihe nondaka oi nekwafo lashike? 19 Woo ou, ta lombwele oshiti, ndele ta ti: “Pashuka!” Nokemanya ihali popi: “Penduka!” Oikalunga oyo tai dulu tuu mbela okulonga eendunge? Tala, oya kwatelwa kumwe koshingoldo nokoshisiliveli, ndele kai na nande omhepo muyo. 20 Ndelenee Omwene omo e li motembeli yaye iyapuki. Edu alishe, mwena koshipala shaKalunga!
© Oshikwanyama Bible Revised © Bible Society of Namibia, 2008, 2012.
