JOB 12 - Oshikwanyama Bible (OKYB)

Enyamukulo laJob

1 Ndelenee Job okwa nyamukula ndele ta ti: 2 “Oshili, heeno, nye hamba ovanhu vashili, nounongo tau ka xula po pamwe nanye. 3 Naame yo ndi neendunge ngaashi nye. Kamu dule nge. Olyelye ina shiiva mbela oinima ya tya ngaha? 4 Aame oshiyolifa sho kaume kange, ame ou nda ifana Kalunga ndele a uda nge. Omuyuki nomuhenashipo a ninga oshiyolifa. 5 Ou e li meameno, ta diladila, nokutya osha wapala okudina oshiponga. Osha longekidilwa ovo omhadi yavo tai tengauka. 6 Omatwali ovakolokoshi taa kala nombili, ovo hava handukifa Kalunga, ohava kala nawa nova kola yo.

7 “Ndelenee pula koinamwenyo, yo otai ku longo, nokeedila dokeulu, do otadi ku shiivifile; 8 ile konakona edu, lo otali ku longo, neeshi domefuta nadi ku hepaululile. 9 Oshilipipo shomuyo aishe itashi shiiva ngeno nokutya, eke lOmwene le shi ninga, 10 Oye ou ta diinine meenghono daye oinamwenyo aishe nomhepo yomunhu keshe? 11 Hakutwi ngeno haku dimbulukwa eendjovo nondakona hai udu eendja? 12 Omulumenhu weenghwakutoka e nounongo, naau e nomafiku mahapu eendunge. 13 PuKalunga ope nounongo neenghonopangelo. Ye e nepukululo neendunge. 14 Tala, Ye ngeenge ta ngumauna po, itapa tungululwa vali. Ou a idililwa mo kuye ita yeululwa mo vali. 15 Tala, Ye ota kelele omeva ndele taa pwiinine. Ye ote a efa a kungulukile po, ndele taa tuvike edu. 16 Puye ope neenghono nomayele. Omupukifwa nomupukifi vo ovaye. 17 Ovapukululi te va twala koilongo, va tikishwa; novatokoli te va ningi omalai. 18 Eemhango deehamba ote di mangulula ndele ta mange ongodi moiya yado vene. 19 Ovapristeli te va twala koilongo, va tikishwa, naava ve neenghono te va shundula. 20 Ye ota dundakanifa eendjovo dovalineekelwa, novakulunhu te va nyeka omayele. 21 Ovanamadina ote va tile okudinwa ndele ta yululula omiya dovanaenghono. 22 Ye ota holola omaulekule a tuvikwa komulaulu, nomulaulu fokofoko te u eta poluhaela. 23 Ye ota nenepekifa oiwana, ndele te i hanauna po. Ye ta tandavelifa oiwana ndele te i twala koilongo. 24 Ovapangeli voshiwana te va kufa eendunge ndele te va elaelifa meefuka dihe neendjila. 25 Hava pamhadala momilaulu muhe nouyelele, Ye ote va tengaukifa ngaashi eengholwe.