Eimbilohambelelo laDebora
1 Mefiku tuu olo Debora naBarak yaAbinoam va imba, tava ti:
2 “Ovakomesho va pitila Israel komesho,
novanhu va li ve nehalo liwa okuliyandja,
onghee hambeleleni Omwene!
3 Udeni, nye eehamba! Pwilikineni, nye ovapangeli!
Ame nda hala okwiimbila efimaneko lOmwene,
nda hala okwiimba efimaneko lOmwene Kalunga kaIsrael.
4 Omwene, Ove eshi wa dja mo muSeir,
Ove eshi wa katuka moshikandjo shaEdom,
edu ola kakama neulu yo la tilashi omeva,
noilemo yo ya tilashi omeva!
5 Eemhunda da tengauka koshipala shOmwene,
Sinai ei moipafi yOmwene Kalunga kaIsrael.
6 “Momafiku aSamgar yaAnat, momafiku aJael,
eendjila da efuwa
novaendanandjila va enda nouxwaxwaila.
7 Ovapangeli va pumba muIsrael, heeno, va pumba shili.
Fiyo ame, Debora, nda fikama,
heeno, ame ina yOvaisraeli, nda fikama.
8 Vo eshi va hoolola oikalunga ipe,
oita ye uya peenhu davo.
Mwa monika tuu oshikelelifo neonga
mokati komayovi omilongo nhee muIsrael?
9 Omutima wange wa dama kovakulunhu vaIsrael,
vo ove liyandja nehalo liwa mokati kovanhu.
Hambeleleni Omwene!
10 “Nye ava hamu londo keendongi eenghadi ditoka,
nye ava tamu hokololifwa,
nye ava hamu ende pominghulo deendjila, popyeni!
11 Ondaka yovaumbi vomauta tai udika pokati komifima,
hava imbi oilonga iyuki yOmwene,
oilonga iyuki yokweendifa kwaye muIsrael.
“Opo nee ovanhu vOmwene va londoloka, va ya keenhu.
12 Debora, penduka!
Penduka! Penduka, penduka, imba eimbilo!
Fikama, Barak! Twala ko eenghwate doye,
omona waAbinoam!
13 Opo nee ava va xupa po, va tula ovaladi va ninge ovakomesho.
Omwene okwa tula nge omupitili komesho wovaladi.
14 MuEfraim mwa dja ava va tula muAmalek,
va shikula omatanga oye Benjamin.
MuMakir mwa dja ovapiti vokomesho,
ndele muSebulon ava ve nodibo yomupuudi.
15 Ovakulunhu vomuIsaskar pamwe naDebora,
ndele ngaashi Barak nosho yo Isaskar:
ye okwe mu shikula nokukulukila mefilu.
Momatanga aRuben
omwa li eenghundafana dinene.
16 Omolwashike mwa kala omutumba pokati koyuunda yoimuna
nokupwilikina okukwena kwoimuna?
Momatanga aRuben
mwa li eenghundafana dinene.
17 Gilead a kala e netulumuko langhele kwinya yaJordan.
NaDan, omolwashike a kala peeskepa?
Asser a kala omutumba pomunghulo wefuta
nopoikololo yaye a tulumukwa.
18 Sebulon ye oshiwana she liyandja mefyo.
Nosho yo Naftali medu lopombada la lalakana.
19 “Eehamba de uya ndele da lwifa,
eehamba daKaanan da lwifa,
muTaanak, pomeva aMegido,
ndelenee inadi kufa oshisiliveli nande.
20 Eenyofi dokeulu da lwifa,
meendjila dado da lwifa Sisera.
21 Okamulonga kaKison ke va twala ko,
okamulonga komalwoodi, okamulonga kaKison.
Omwenyo wange, inda ko neyombamo!
22 Opo nee omakondo eenghambe a mbulukuta nokutondoka,
ovaladi eshi ve di londa nokutondoka.
23 ‘Tuleni omutima Meros,’ omweengeli wOmwene ta ti.
‘Heeno, oonakukalamo musho nava tulwe omutima,
osheshi inave uya okukwafa Omwene,
okukwafa Omwene mokati kovaladi.’
24 “Mokati kovalikadi, Jael omwalikadi waEber, Omukeni,
na nangekwe noupuna.
Na nangekwe noupuna mokati kovalikadi hava kala momatwali.
25 Ye okwa pula omeva, ndelenee ye okwe mu pa omashini,
molwiyo la wapala okwa eta omashini a pama.
26 Eke laye te li nanene kombosha
neke laye lokolulyo kohamala yomupangeli.
Ndele ye ta valele Sisera,
ta tataula omutwe waye
ndele ta teyaula nokutyuula pombadu yomutwe waye.
27 Okwa tekela peemhadi daye, a wila,
opo a nangala!
Peemhadi daye a tekela, a wila po.
Apa a tekela, oko a nangala, a dipaelwa po.
28 Ina yaSisera ta tale mombululu yekende,
ndele ta ingida moikulo yekende:
‘Omolwashike etemba laye la kala ko?
Omolwashike eengobe detemba tadi findada?’
29 Omunongoelela womovambada te mu nyamukula,
heeno, ye mwene ta nyamukula eendjovo daye:
30 ‘Vo ova kwata kashuude oixuulwa ndele tave i tukula:
omupika umwe omukainhu, heeno,
ovapika vavali ovakainhu komulumenhu keshe,
oshihakanwa shoikutu yoluvala kuSisera,
heeno, oshihakanwa shoikutu yoluvala, yomaluvala mahapu.
Oshikaiwa sholuvala, heeno,
oikaiwa ivali yomaluvala mahapu oshihakanwa mofingo yange.’
31 “Ovatondadi voye aveshe, Omwene,
osho ve nokukombwa po!
Ndelenee ava ve mu hole,
ove li ngaashi etango tali piti meenghono dalo.”
Noshilongo sha tulumukwa omido omilongo nhee.
© Oshikwanyama Bible Revised © Bible Society of Namibia, 2008, 2012.
