Eimbilopandulo molwekwafo likumwifa laKalunga
Epsalome, eimbilo la pewa enyakwa lolwiimbo.
1 Edu alishe, kuwilila Kalunga!
2 Imbileni efimano ledina laye ehambelelo,
neimbilopandulo laye nali mone etumbaloshinge.
3 Tyeni kuKalunga: “Oilonga yoye ikumwifa oi fike peni!
Molwouyadi weenghono doye,
ovatondi voye otave linyongamene kwoove.
4 Oilongo aishe oi nokulinyongamena kwoove
noku ku imbila,
nokwiimbila edina loye ehambelelo.” Sela
5 Ileni, mu tale oilonga yaKalunga,
ou ta kumwifa mokukala kwaye kombada yovanhu.
6 Omeva efuta okwe a shitukifa edu likukutu,
opo ve li taulule kolupadi;
onghee nee twa kala twe mu hafela.
7 Meenghono daye ota pangele fiyo alushe;
omesho aye otaa pashukile oiwana yoilongo:
ovalundakani ite va efa va kulukute nande. Sela
8 Oiwana nye, tangeni Kalunga ketu,
efimano laye nali udike mokule!
9 Oye e tu pa omwenyo,
neemhadi detu ine di efa, di fenhuke.
10 Heeno, Kalunga, Ove we tu pepela tuu,
owe tu yelifa ngaashi outale woshisiliveli tau yelifwa.
11 Owa efa, tu yulwe keendjadja,
nowe tu kuminika oudjuu mudjuu meembuda detu;
12 Owa efa, ovanhu va ende kombada yomitwe detu,
otwa li hatu taulula omundilo nomeva;
ndelenee hauxuuninwa owe tu kufa mo,
nowe tu twala mouyadi.
13 Onde uya meumbo loye nomalungwinifoyambo,
onde ku wanifila omaudaneko ange,
14 oo nde a tonga nomilungu dange,
nokanya kange ke e ku udanekela, eshi nda li moudjuu.
15 Onde uya, nde ku etela omalungwinifoyambo,
eedi da ondoka,
nomwifi wetwimino loikombo;
onda hala okulongekida eedidi neehove. Sela
16 Ileni amushe, mu pwilikine,
nye ava hamu tila Kalunga,
ndi mu hepaululile ashishe,
eshi Ye a ningila omwenyo wange.
17 Ame onda ifana kuye mokule nokanya kange,
nehambelelo ola holokela shimwe melaka lange.
18 Ngeno nda diladila owii momutima wange,
Omwene ngeno ina uda nge.
19 Ndelenee Kalunga okwa uda nge nokuli,
okwa dimbulukwa eindilo lange.
20 Kalunga na fimanekwe,
ou ina dina eindilo lange,
nouwanghenda waye ine u nyekulula nge.
© Oshikwanyama Bible Revised © Bible Society of Namibia, 2008, 2012.
