MuJerusalem otamu di exupifo loiwana aishe
1 Ondjovo ei, ya monika kuJesaja yaAmos, tai popi Juda naJerusalem.
2 Pomaxulilo omafiku omhunda yongulu yOmwene otai ka kala ya pamenena, koxulo yeemhunda adishe, ndele otaku tondokele oiwana aishe. 3 Noiwana ihapu oko tai ka ya, ndele tai ti: “Ileni tu ka londeni komhunda yOmwene, okongulu yaKalunga kaJakob, opo e tu longe eendjila daye, fye tu shiive okweenda momalila aye. Osheshi muSion otamu di omhango nomuJerusalem otamu di ondjovo yOmwene.” 4 Ndele Ye ota ka tokola pokati koiwana, ndele ta yukifa oiwana yomoilongo ihapu. Ndele vo otava ka hambula omaongamukonda omatemo, nomaonga avo oikashulifo; ndele itava ka lwifafana vali nongaashi itave lilongo vali oukwaita.
5 Yambuka, oove eumbo laJakob, natu kaleni nokweenda mouyelele wOmwene. 6 Osheshi ove owa ekelashi oshiwana shoye, eumbo laJakob, shaashi ove yadi eenghedi dokoushilo noupule wOvafilisti, notave livale oukaume novanailongo. 7 Nedu lavo oli yadi oshisiliveli noshingoldo, nemona lavo lihapu lihe nondjele; nedu lavo oli yadi eenghambe nomatemba avo oita ehe fi kuvalwa. 8 Edu lavo oli yadi oikalunga, ndele vo ohave linyongamene oshilonga shomake avo, eshi sha hongwa kominwe davo. 9 Osho ngaho omunhu ota ka ninipikwa nomulumenhu ota ka xutulwa; ndele Ove ino shi va dimina po. 10 Ningina mekololo lemanya, ove u ka hondame medu, u hondame ehalwifo lOmwene noshingevilimo sheenghonopangelo daye. 11 Omesho ovanhu ve hole ounhwa taa ka ninipikwa, nelitumbo lomulumenhu otali ka xutulwa; Omwene Oye aeke ta ka kala mefiku olo munene a fimana.
12 Osheshi efiku lOmwene womatanga ovakwaita tali uya kombada yaashishe eshi shi nounhwa nosha fulalala, nokombada yaashishe she litumba pombada, opo shi findilwe poshi, 13 kombada yomisederi daLibanon odo dinene da fimana nokombada yomiandi domuBasan, 14 kombada yeemhunda dile noikulundudu ya fimana, 15 kombada yeeshungo dile nakeshe omakumahote a pama, 16 nokombada yomawato aeshe omuTarsis, nokombada yoilonga aishe yeenghulungu. 17 Opo nee okulitumba kwovanhu otaku dengwa poshi, nelinenepeko lovalumenhu otali xutulwa, nOmwene Oye aeke ta ka kala munene mefiku olo. 18 Oikalunga otai ka xula po filufilu. 19 Ndele ovo tava ka ningina momakololo omamanya nomomambulukwena oikulundudu ndele tava ka hondama omatilifo Omwene noshingevilimo sheenghonopangelo daye, ngeenge ta fikama a kakamife edu. 20 Mefiku tuu olo omunhu ota ekeleshi oikalunga yaye yoshisiliveli noyoshingoldo, e i hambula e linyongamene kuyo, ndele te i pe eemhuku nomalimalima, 21 opo nee vo otava hondama momakololo omamanya nomomambulukwena oikulundudu, tava hondama omatilifo Omwene noshingevilimo sheenghonopangelo daye, ngeenge ta fikama a kakamife edu. 22 Hano tongokeni movanhu ve nomufudo momayulu; oye ota ka yelekwa nashike?
© Oshikwanyama Bible Revised © Bible Society of Namibia, 2008, 2012.
