HESEKIEL 9 - Oshikwanyama Bible (OKYB)

Ovaliteeki tava dipawa

1 Opo Ye okwa ingida mokule momatwi ange ndele ta ti: “Eheneni oku, nye ovahandukili voshilando, nakeshe umwe na kale e noiti yokuhanauna meke laye!” 2 Ndele tala, ovalumenhu vahamano ve uya nondjila okudja koshivelo shokombada, eshi sha ama koumbangalanhu, nakeshe umwe e noiti yokuhanauna meke laye. Mokati kavo mwa li omulumenhu umwe a djala oshikutu sholiina, e noishangifo moshiya shaye. Ndele vo ove uya ndele tava kala ofika popepi noaltari yoshikushu. 3 Ndele oshinge shaKalunga kaIsrael sha yeluka, sha dja kombada yomukerubi oko sha li ko, ndele sha ehena koshikulo shoposhi shoshivelo shotembeli. Ndele Ye okwa ingida komulumenhu ou a djala oshikutu sholiina, ou a li e noishangifo moshiya shaye. 4 Ndele Omwene okwe mu lombwela: “Endaenda moshilando, endaenda muJerusalem, ndele ninga edidiliko meembaba doipala yovalumenhu ava hava keme nokunyika oluhodi omolwoixuna aishe ei ya ningwa mo.” 5 Ndelenee okwa lombwela vakwao nde shi uda, ndele ta ti: “Mu shikuleni nokweendaenda moshilando nokudipaa. Omesho eni aha tale nolukeno ndele inamu filonghenda. 6 Dipaeni ovaxungu novamati noukadona, nounona novalikadi, inamu xupifa po sha. Ndelenee inamu kuma nande umwe waava ve nedidiliko, ndele hoveleni motembeli yange.” Ndele vo ova hovela povalumenhu, nokutya ovakulunhu ava va li pondje yotembeli. 7 Ndele Ye okwe va lombwela: “Nyatekeni otembeli nomikala di yadifeni novadipawa. Indeni!” Ndele ova ya ndele va dipaa moshilando.

8 Ndele vo eshi va li tava dipaa ndele ame nda xupa po, ame nda wila po eombe ndele nda ingida handi ti: “Akutu, Omwene Kalunga, Ove oto mane po ngaho oshixupe ashishe shaIsrael eshi to tilile kombada yaJerusalem ehandu loye?” 9 Opo Ye okwa lombwela nge: “Oulunde weumbo laIsrael nolaJuda ounene kau shi kuyelekwa, noshilongo shi yadi omatimba ohonde, noshilando shi yadi eendameko lomatokolo. Osheshi ye okwa nyamukula nge: Omwene okwa efa edu, nOmwene ke wete ko. 10 Onghee hano, kombinga yange, eisho lange itali ka tala nolukeno, ndele Ame ihandi ka filonghenda. Okweenda kwavo Ame ohandi ke ku undwila kombada yomitwe davo.” 11 Ndele tala, omulumenhu ou a djala oshikutu sholiina, moshiya shaye mwa li oishangifo, okwa eta ondaka ei: “Ame nda wanifa eshi nda lombwelwa.”