Moses naAron koshipala shaFarao
1 Ndele Moses naAron ova ya kuFarao ndele tava ti kuye: “Omwene Kalunga kaIsrael ta ti ngaha: ‘Lekela oshiwana shange, shi ka ningile nge oshivilo mombuwa.’ ”
2 Ndelenee Farao ta nyamukula: “Omwene olyelye, ame ndi pwilikine ondaka yaye ndi lekele Israel? Omwene ou kandi mu shii noitandi ka lekela Israel a dje mo.” 3 Vo otava ti: “Kalunga kOvaheberi okwe tu shakeneka. Tu lekela hano, tu ka ye mondjila yomafiku atatu, tu ka yambele Omwene Kalunga ketu mombuwa, opo ehe tu dipaife oudu wolutapo ile eongamukonda.” 4 Ndelenee ohamba yaEgipiti ye va nyamukula, tai ti: “Moses naAron, omolwashike tamu kelele ovanhu va longe oilonga yavo? Indeni mu ka longe! 5 Farao okwa tile vali: Taleni, ovanhu vomoshilongo ovahapu nokuli, ndele mwa hala va fe oilonga yavo?”
6 Mefiku tuu olo Farao okwa lombwela ovafininiki vomovanhu novapashukili voilonga, ndele ta ti: 7 “Ovanhu inamu va pa vali omwiidi mokufoloma eedopi ngaashi shito. Ovo vene nave ke liongelele omwiidi. 8 Ndelenee eedopi di fike pwaadinya donghela nodongheleinya mu noku di pula kuvo. Inamu ninipalifa omuvalu wado. Osheshi vo ovandede. Onghee hava ingida tava ti: ‘Tu ka ningile Kalunga ketu exwikilo!’ 9 Oshilonga nashi ninge shidjuu shili kovalumenhu, opo va kale mokulonga, vaha pwilikine eendjovo doipupulu.” 10 Opo nee ovafininiki vovanhu novapashukili va pita mo ndele va lombwela ovanhu ndele tava ti: “Farao osho ta ti: ‘Itandi mu pe omwiidi nande. 11 Indeni nye vene mu ka tale ko omwiidi keshe apa tau monika. Ndele oilonga yeni itai shuna monima.’ ” 12 Opo nee ovanhu va endaenda moshilongo ashishe shaEgipiti va ka ongele oimbodi ponhele yomwiidi. 13 Novafininiki va fininika ndele tava ti: “Wanifeni oshilonga sheni keshe efiku naanaa ngaashi mefimbo linya pa li omwiidi.” 14 Hano ovalongifi venya Ovaisraeli va dengwa kovafininiki ava va tulwa po kuFarao, ndele tava ti: “Oshike hano inamu wanifa oilonga yeni onghela nonena, ngaashi shito, mu wanife omuvalu weedopi ngaashi mwa lombwelwa?”
15 Onghee hano ovapashukili Ovaisraeli va ya nova kemena Farao ndele va pulwa: “Omolwashike ove ho ningile ngaha novapiya voye? 16 Osheshi ovapiya voye itava pewa omwiidi, naavenya tava ti kufye: ‘Folomeni eedopi!’ Ndele tala, ovapiya voye tava dengwa, ndelenee oushima u li movanhu voye.” 17 Ndelenee ye okwa nyamukula ta ti: “Onye ovandede, heeno, ovandede. Onghee tamu ti: ‘Tu lekela tu ka ningile Omwene exwikilo.’ 18 Hano paife eshi indeni ashike mu ka longe. Ndelenee itamu pewa omwiidi. Ndelenee wanifeni omuvalu weedopi naanaa.” 19 Opo nee ovapashukili Ovaisraeli ove liwete vo nhumbi ve li moudjuu, eshi pa lombwelwa: “Nye mu nokuwanifa eedopi deni keshe efiku omuvalu wado; omuvalu itau shunifwa monima.” 20 Ndele ve uya kuMoses naAron ava va li ko ofika ve va shakeneke venya eshi va dja kuFarao, 21 ndele vo ove va lombwela: “Omwene ne mu kwatele onghone noku mu tokola, eshi nye mwe tu tondifa momesho aFarao nomomesho ovapiya vaye, osheshi mwa yandja meke lavo eongamukonda vo ve tu dipae.”
22 Opo nee Moses okwa ya vali kOmwene ndele ta ti: “Omwene, omolwashike wa ningila oshiwana eshi owii? Omolwashike Ove wa tuma nge oku?
23 “Osheshi okefimbo tuu linya nda ya kuFarao ndi popye medina loye, ye okwa hepeka oshiwana eshi, naave ino xupifa oshiwana shoye.”
© Oshikwanyama Bible Revised © Bible Society of Namibia, 2008, 2012.
