David naJonatan
1 Ndele ye eshi a mana okupopya naSaul, omwenyo waJonatan we limanga kumwe nomwenyo waDavid, ndele Jonatan oku mu hole ngaashi omwenyo waye mwene. 2 Ndele Saul okwe mu kufa, ine mu efa a shune vali keumbo. 3 Opo nee Jonatan okwa panga oukaume naDavid, shaashi ye e mu hole ngaashi omwenyo waye mwene. 4 Ndele Jonatan okwe lidula oshikutu shokombada nokwe shi pa David. Heeno, noikutu yaye yo neongamukonda laye nokuli nouta waye nomwiya waye. 5 Ndele David okwa ya keshe apa Saul e mu tuma, ndele ye okwa li e nelao, onghee hano Saul e mu lenga a ninge omukulunhu wovakwaita. Osho sha wapalela ovanhu aveshe novapiya vaSaul yo.
Saul ta tondo David
6 Ndele vo eshi ve uya keumbo, naDavid yo okwa aluka, eshi a dipaa Omufilisti, ovakainhu va pita mo moilando aishe yaIsrael va ka shakeneke Saul nokukuwilila nokutanha noungoma nokwiimba omaimbilo ehafo nouxumbafeta noivela tai kwelengedja. 7 Novakainhu va hafa tava imbi tava ti:
“Saul okwa dipaa eyovi
ndelenee David omayovi omulongo.”
8 Ndele Saul okwa handuka unene, osheshi eendjovo odo inadi mu wapalela. Ndee ye ta ti: Vo ova pa David omayovi omulongo, ndelenee ame eyovi. Paife ouhamba ashike we mu pumba. 9 Ndele okudja kefiku tuu olo Saul okwa tala David nomesho mai. 10 Mefiku la shikula omhepo ii ya tumwa kuKalunga ya hanga Saul, onghee hano ye okwa li ta pwidauka mouhamba waye, fimbo David ta shiki okaxumbafeta ngaashi shito Ndele Saul okwa li e neonga meke laye. 11 Opo nee Saul ta umbu eonga ndee ta ti: “Onda hala okutwa David, ndi mu twile kumwe nekuma!” Ndelenee David okwa yepa luvali. 12 Ndele Saul okwa tila David, osheshi Omwene okwa li e mu na ndele a fiya po Saul. 13 Opo nee Saul e mu lekela nokwe mu lenga a ninge omuneyovi, onghee hano okwa pitila ovakwaita komesho mokudja po nomokwaaluka.
David ta ningi oshitenya shohamba
14 Ndele David okwa li e nelao meendjila daye adishe, osheshi Omwene okwa li e mu na. 15 Saul eshi a mona nokutya, David okwa li e nelao, okwe mu tila. 16 Ndelenee Ovaisraeli aveshe nOvajuda ve hole David, shaashi ye okwa pitila ovakwaita komesho mokudja po nomokwaaluka. 17 Saul okwa lombwela vali David: “Omona wange okakadona oshiveli Merab ou, ohandi mu ku pe a ninge omwalikadi woye. Kala ashike omukwaita ndele diinina oita yOmwene.” Osheshi Saul a diladila: Eke lange lihe mu kume, ndelenee eke lOvafilisti nali mu kume. 18 Ndele David okwa tya kuSaul: “Aame omushike, eumbo lange nepata latate muIsrael olo eshike, ame ndi ninge oshitenya shohamba?” 19 Ndelenee mefimbo olo Merab, omona okakadona kaSaul, kwa li e nokupewa David, ye okwa pewa Adriel, Omumeholati, a ninge omwalikadi waye. 20 Ndelenee Mikal, omona okakadona kaSaul, okwa li e hole David. Ndele vo eshi ve shi lombwela Saul, osho she mu wapalela. 21 Osheshi Saul a diladila: Ame ohandi ke mu yandja kuye, ye a ninge omwiyo waye, opo eke lOvafilisti li mu kume. Onghee hano Saul okwa lombwela David lutivali: “Ove to dulu okukala oshitenya shange.” 22 Ndele Saul okwa lombwela ovapiya vaye ta ti: “Lombweleni David ongumitila mu tye: Tala, ohamba ye ku hokwa, novapiya vayo aveshe ve ku hole. Ninga hano paife oshitenya shohamba.” 23 Ovapiya vaSaul va lombwela hano David eendjovo odo. Ndelenee okwa pula: “Oshinima shinini hamba okuninga oshitenya shohamba, shaashi ame omulumenhu ohepele nomuxupinhu?” 24 Novapiya vaSaul ve mu shiivifila: Eendjovo da tya ngaha David e di popya. 25 Opo nee Saul ta ti: “Lombweleni David mu tye: Ohamba inai hala oyoonda imwe, oipa efele limwe yeenhele doulumenhu Ovafilisti, oyo aike opo ovatondadi vohamba va handukilwe.” Saul okwa diladila nokutya, David ta ka dipawa keke lOvafilisti. 26 Ovapiya eshi va lombwela David eendjovo odo, oshinima sha wapalela David a ninge oshitenya shohamba. Ndele fimbo omafiku a pangelwa inaa xula, 27 David okwa fikama nokwa ya novalumenhu vaye, ndele va dipaa ovalumenhu omafele avali Ovafilisti. Ndele David okwa eta oipa yeenhele doulumenhu wavo, ndele e i yandja ya wana kohamba, opo a shiive okuninga oshitenya shohamba. Opo nee Saul a yandja kuDavid omona waye okakadona Mikal a ninge omwalikadi waye. 28 Saul eshi a mona nokutya, Omwene a kala naDavid, naMikal, omona okakadona kaSaul e mu hole.
29 Saul okwa tila unene David, ndele Saul okwa ninga omutondadi waDavid omafiku aeshe. 30 Ndelenee eehamba dOvafilisti da homona. Ndele alushe do eshi da homona, elao laDavid la hapupala li dule lovapiya aveshe vaSaul, onghee hano edina laye la fimanekwa unene pombada.
© Oshikwanyama Bible Revised © Bible Society of Namibia, 2008, 2012.
