Omwene Oye ohamba yoiwana aishe
Epsalme lOvakora, la pewa enyakwa lolwiimbo.
1 Oiwana yoilongo nye amushe, panduleni nomake!
Nyakukilweni Kalunga nondaka inene.
2 Osheshi Omwene omunene
wOkombadambada, a tilika,
ohamba inene kombada yedu alishe.
3 Oilongo okwe i findila mepangelo letu,
omaludi nomaludi okwe a tula koshi yeemhadi detu.
4 Oye e tu hoololela ombinga yefyuululo letu,
oshifimanekwalongo shaJakob,
ou a hokiwa kuye. Sela
5 Kalunga okwa londa kolukalwapangelo laye nokunyakukilwa,
Omwene a ya koshipundi shaye mendudumo lomanghuma.
6 Imbileni Kalunga ehambelelo, imbeni ehambelelo.
Imbileni ohamba yetu ehambelelo, imbeni ehambelelo.
7 Osheshi Kalunga Oye ohamba yedu alishe:
onghee hano mu imbileni eimbilo lehambelelo.
8 Kalunga Oye ohamba yoiwana,
Kalunga e li omutumba kolukalwapangelo laye liyapuki.
9 Eedalekele doilongo oda ongala puye,
da ninga oshiwana shaKalunga kaAbraham.
Osheshi oikelelifo yedu oyaKalunga,
Oye a fimana pombada.
© Oshikwanyama Bible Revised © Bible Society of Namibia, 2008, 2012.
