LEVITIKUS 3 - Oshikwanyama Bible (OKYB)

Epanduloyambo

1 “Ndele eyambo laye ngeenge epanduloyambo, e nokweeta koshipala shOmwene oshinamwenyo shihe noshipo, ngeenge te shi eta meengobe, ongobe yomhedi ile ondema. 2 Ndele ye e nokutenheka eke laye komutwe weyambo laye noku i tomena poshivelo shetwali leongalo. Novapristeli, ovamati vaAron, ve nokutila ohonde keembinga adishe doaltari. 3 Opo nee ye e nokweetela Omwene omundiloyambo wepanduloyambo: omakaadi aa e li kombada yomandjadja nomakaadi aeshe aa e li momandjadja, 4 neefiyo adishe mbali nomakaadi okudo needi nokapuununwa kexuli ove u noku i kufa pamwe neefiyo. 5 Novana ovamati vaAron ve noku i xwika po koaltari kexwikiloyambo olo li li koikuni kombada yomundilo eshi osho omundiloyambo wedimba liwa kOmwene.

6 “Ndele eyambo laye ngeenge odi ile oshikombo, ye te shi etele Omwene epanduloyambo, ye e noku shi eta shihe noshipo, odi ondume ile onghadi. 7 Ye ngeenge ta eta odi onghadi eyambo, ye e noku i eta koshipala shOmwene 8 nokutenheka eke laye komutwe weyambo laye ndele te i dipaa komesho yetwali leongalo. Novana ovamati vaAron ve nokutila ohonde keembinga adishe doaltari. 9 Opo nee ye e nokweetela Omwene omakaadi epanduloyambo: omakaadi aeshe, nomushila e noku u teta pekalo, nosho yo omakaadi aa e li kombada yomandjadja nomakaadi aeshe aa e li momandjadja, 10 neefiyo adishe mbali nomakaadi ado nokaxulixuli kexuli e noku i kufa pamwe neefiyo. 11 Nomupristeli e noku i xwikila po koaltari ngaashi omundiloyambo kOmwene.

12 “Ndele eyambo laye ngeenge oshikombo, ye e noku shi eta koshipala shOmwene 13 nokutenheka eke laye komutwe washo noku shi dipaela komesho yetwali leongalo. Novana vaAron ve nokutila ohonde keembinga adishe doaltari. 14 Opo nee ye e nokweetela Omwene eyambo lomuyo loinhimbu imwe omundiloyambo: omakaadi aa e li kombada yomandjadja nomakaadi aa e li momandjadja, 15 neefiyo adishe mbali nomakaadi ado nonokaxulixuli e noku i kufa pamwe neefiyo. 16 Nomupristeli e noku i xwikila po koaltari ngaashi eendja domundiloyambo, edimba liwa. Omakaadi aeshe oo Omwene. 17 Oyo onghedimhango yaalushe komapupi nomapupi meenhele deni adishe: ‘Inamu lya nande omakaadi nohonde.’ ”