Efiku lOmwene
1 Tala, Ame ohandi tumu omutumwa wange, ou ta ka kokolela nge ondjila yange. Opo Omwene ou tamu mu kongo, ote ke uya divadiva motembeli yaye, nokutya Omweengeli wehangano, ou mwe mu djuulukwa. Tala, Ye ote uya, Omwene womatanga ovakwaita ta ti. 2 Ndelenee olyelye ta dulu okulididimika efiku leuyo laye? Ndele olyelye ta dulu okukala po, Ye eshi ta holoka? Osheshi Ye e li ngaashi omundilo womeleva lomuhambwidi nongaashi ofewa yomukoshi. 3 Ndele Ye ota ka kala omutumba, ngaashi omuhengumuni nomuyelifi woshisiliveli, ndele Ye ota ka yelifa ovana ovamati vaLevi ndele te va yelifa ngaashi oshingoldo noshisiliveli, opo vo tava ka etela Omwene eyambo nouyuki. 4 Opo nee eyambo laJuda nolaJerusalem tali ka wapalela Omwene, ngaashi momafiku onale nongaashi momido domounyuni wonale. 5 Ndele Ame ohandi ka ehena kunye ndi ninge etokolo, ndele Ame handi endelele okuninga ondobwedi ndi tokole eendudu novatei vohombo naava va ana moipupulu nohava fininike omulongeli wondjabi mokufuta, novafiyekadi neefiye. Naava hava ngolyola eendjovo domunailongo ndele itava tila nge. Omwene womatanga ovakwaita ta ti.
6 Osheshi Ame Omwene ihandi lunduluka. Ndele nye ovana vaJakob inamu xula po. 7 Okudja komafiku ooxo nye mwa efa eemhango dange, ndele inamu di diinina. Alukileni kwaame, opo Ame nda hala okwaalukila kunye, Omwene womatanga ovakwaita ta ti. Ndelenee nye tamu pula: Mushike tu nokwaaluka? 8 Omunhu ota nyeka tuu Kalunga? Osheshi nye otamu nyeka nge ndele tamu ti: Mushike twe ku nyeka? Moitimulongo nomoiyandjiwa. 9 Nye mwa fingwa nokufingililwa, ndelenee natango tamu nyeka nge, nye, oshiwana ashishe. 10 Eteni oitimulongo aishe ya wana kelimba lange, opo mongulu yange mu kale eendja. Ndele yelekeni nge nye mu tale, Omwene womatanga ovakwaita ta ti, ngeenge ihandi ke mu yeululila omakende keulu ndele handi ke mu lokifila enangekonoupuna la wanenena. 11 Noshipaxu yo ohandi ke shi taataa punye, opo shiha hanaune po oiimati yomapya eni. Nomiviinyu domomapya itadi ka kala itadi ima, Omwene womatanga ovakwaita ta ti. 12 Opo nee oiwana aishe tai ke mu tanga nye ovanelao, osheshi nye otamu ka kala oshilongo sha hokiwa, Omwene womatanga ovakwaita ta ti.
13 Eendjovo deni mokupopya nge odi nodino, Omwene ta ti. Ndelenee nye tamu pula: Fye otwe ku popya ngahelipi mokati ketu? 14 Nye mwa tile: Okulongela Kalunga itaku kwafa sha, notwa mona shike mokudiinina kwetu onghedimhango yaye nokweenda twa djala oikutu yeefya koshipala shOmwene womatanga ovakwaita? 15 Hano paife ohatu tange elao lovashishimani. Havo aveke ava hava dini Kalunga tava kala va pama, nonande vo hava shindi Kalunga ve li memanguluko.
16 Opo vo ava hava tila Omwene ova kundafana kumwe. Ndele Omwene okwe shi dimbulukwa nokwe shi uda. Nokoshipala shaye pa shangwa embo lokudimbulukwa ava hava tila Omwene nohava fimaneke edina laye. 17 Ndele vo otava ka ninga emona lange mefiku olo handi ke li shita, Omwene womatanga ovakwaita ta ti. Ndele Ame ohandi ke va filonghenda ngaashi omulumenhu ta file omona waye omumati onghenda, ou te mu longele. 18 Opo nee nye tamu ka mona vali etongolo pokati kovayuki novadinikalunga, pokati kaau ha longele Kalunga naau ihe mu longele.
© Oshikwanyama Bible Revised © Bible Society of Namibia, 2008, 2012.
