Okuyapulilwa oshilonga shoupristeli
1 Omwene okwa popya vali naMoses ndele ta ti: 2 “Kufa Aron pamwe novana vaye ovamati pamwe naye, noikutu nomaadi okuvava, nongobe yomhedi yetimbayambo needi mbali eendume nokambale ke noikuki inamu ya onhafi, 3 ongela eongalo alishe poshivelo shetwali leongalo.” 4 Ndele Moses okwa ninga ngaashi Omwene e mu lombwela, neongalo ola ongala poshivelo shetwali leongalo. 5 Opo nee Moses ta lombwele eongalo ta ti: “Oshinima eshi osho Omwene a tonga shi ningwe.” 6 Ndele Moses okwa ehenifa kuye Aron novana vaye ovamati ndele okwe va kosha nomeva. 7 Opo nee okwe mu dika oshikutu shokoshi, nokwe mu mangifa omwiya woshiyata nokwe mu dika oshikutu shokombada. Ye okwe mu dika yo oshikutu shokomapepe ndele okwe mu mangifa ongodi yoshikutu shokomapepe noyo a mangifa oshikutu shokomapepe. 8 Natango ye okwa tula ponhulo yaye okapapa koponhulo nokwa tula mo mokapapa Urim naTummim. 9 Nokwa tula embale komutwe waye nokembale kombinga yokomesho okwa tula ko okapapa koshingoldo komombaba yoshipala, oshishani shiyapuki, Omwene ngaashi a lombwela Moses.Okwe mu djaleka okapapa komonhulo…nokwa tula embale komutwe waye. 10 Opo nee Moses okwa kufa omaadi okuvaeka, nokwa vaeka etwali liyapuki noinima aishe ya li mo okwe i yapula. 11 Nokwa shamina nao luheyali oaltari nokwa vaeka oaltari noilongifo yayo aishe, nelikoshelotemba noshikwatelwamhadi shalo noku i yapula. 12 Opo nee ye okwa tila omaadi okuvaeka komutwe waAron nokwe mu vaeka a yapulwe. 13 Moses okwa ehenifa yo kuye ovana ovamati vaAron nokwe va dika oikutu yokoshi nokwe va mangifa eemwiya doshiyata nokwa dingila komitwe davo omambalelapi, ngaashi Omwene e mu lombwela.
14 Opo nee okwa etifa po ongobe yomhedi yetimbayambo, naAron novana vaye ovamati va tenheka omake avo komutwe wongobe yomhedi yetimbayambo. 15 Ndele Moses okwe i toma nokwa kufa ohonde nokwa polola nomunwe waye keembinga doaltari nokwa kwatakanifa oaltari. Ndelenee ohonde ya xupa po, okwe i tila kombinga yokoshi yoaltari. Osho ngaha hano okwe i yapula moku i kwatakanifa. 16 Ye okwa kufa vali oipuununwa yokomandjadja nokaxulixuli neefiyo noinghene yado, ndele Moses okwe i lungwinifa koshiyambelo e i yambe. 17 Ndelenee ongobe yomhedi nekungha layo nombelela yayo noshandja shayo okwe i xwikila po pondje, Omwene ngaashi a lombwela Moses.
18 Opo nee ye okwa etifila po odi yondume yexwikiloyambo, naAron novana ovamati vaye va tenheka omake avo komutwe wodi yondume, 19 ndele Moses okwe i dipaa nohonde e i tila keembinga adishe doaltari. 20 Ye okwa tukaula yo odi yondume oinhimbu, naMoses okwa xwika po omutwe noinhimbu nomakaadi. 21 Ndelenee okwa kosha nomeva omandjadja nomakondo, ndele Moses okwa xwika po odi yondume aishe koaltari. Olo exwikiloyambo ngaashi edimba liwa, heeno, olo la li omundiloyambo wOmwene, Omwene ngaashi a lombwela Moses.
22 Opo nee ye okwa etifila odi ikwao yondume, nokutya odi yeyapulo; naAron novana ovamati vaye va tenheka omake avo komutwe wodi. 23 Ndele Moses okwe i dipaa nokwa kufa ohonde imwe nokwe i polola pokutwi kwokolulyo kwa Aron nopomunwe wakula wokeke lokolulyo nopomunwe wakula wokomhadi yokolulyo. 24 Moses okwa ehenifa po yo ovana ovamati vaAron, nohonde imwe ye okwa polola pokutwi kwavo kwokolulyo nopomunwe wavo wakula wokeke lokolulyo nopomunwe wakula wokomhadi yavo yokolulyo. Opo nee Moses okwa tila ohonde keembinga adishe doaltari. 25 Ndele ye okwa kufa omakaadi odi nomakaadi okomushila nomakaadi aeshe a kala komandjadja nokaxulixuli neefiyo mbali nomakaadi ado noshilama shokolulyo. 26 Mokambale komingome ihe nonhafi, aka ka kala koshipala shOmwene, ye okwa kufa mo yo omungome umwe weundu nomungome wa lungilwa omaadi noshikuki shimwe shepapi. Nokwe i tula koipambu yomakaadi nokoshilama shokolulyo. 27 Naaishe ei okwe i tula momake aAron nomomake ovana vaye ovamati. Nokwe i dungadungifa edungadungifwayambo koshipala shOmwene. 28 Opo nee Moses e i tambula momake avo nokwe i xwika po koaltari kombada yexwikiloyambo. Olo eyapuloyambo ngaashi edimba liwa, omundiloyambo wOmwene.
29 Moses okwa kufa vali ombadja nokwe i dungadungifa koshipala shOmwene edungadungifwayambo. Yo oya ninga oshipewa shaMoses shomodi yeyapulo, Omwene ngaashi a lombwela Moses. 30 Moses okwa kufa yo momaadi okuvaeka nomohonde ei ya kala koaltari, nokwe i shamina Aron noikutu yaye novana vaye ovamati noikutu yavo. Osho ngaha hano okwa yapula Aron noikutu yaye, novana vaye ovamati noikutu yavo.
31 Opo nee Moses okwa lombwela Aron novana vaye ovamati, ndele ta ti: “Teleka ombelela poshivelo shetwali leongalo, ndele i lilei ko pamwe nomungome u li mokambale keyapulo, ngaashi nda lombwelele nokutya: Aron novana vaye ovamati ve noku i lya po. 32 Ndelenee eshi sha xupa po kombelela nokomungome, nye mu noku shi xwika po momundilo. 33 Momafiku aheyali nye inamu dja po poshivelo shetwali leongalo fiyo okefiku olo mulo omafiku eyapulo leni a pwa ko. Osheshi eyapulo leni li nokukala omafiku aheyali. 34 Ngaashi sha ningwa nena osho shi nokuningwa nokomesho ngaashi elombwelo lOmwene, opo mu kwatakanifwe. 35 Nye mu nokukala poshivelo shetwali leongalo omafiku aheyali oufiku nomutenya. Nomu nokudiinina omalombwelo Omwene muha fye. Osheshi osho ngaha hano ame nda lombwelwa.”
36 Ndele Aron novana vaye ovamati va ninga oinima aishe ei Omwene e i lombwela Moses.
© Oshikwanyama Bible Revised © Bible Society of Namibia, 2008, 2012.
