Otembeli tai tungululwa
1 Momudo omutivali wohamba Darius mefiku lotete lohani onhihamano, ondjovo yaKalunga ya dilila momuxunganeki Haggai noya hanga Serubbabel yaSalatiel, omutekuli waJuda, naJosua yaJosadak, omupristeli omukulunhu, ndele tai ti: 2 Omwene womatanga ovakwaita osho ta ti: “Oshiwana eshi tashi ti: efimbo letungululo lotembeli yOmwene inali fika natango.” 3 Ndelenee ondjovo yOmwene ye uya komuxunganeki Haggai ndele tai ti: 4 “Efimbo la fika mbela mu kale momaumbo eni a dikika, fimbo ongulu ei yOmwene tai kala ya ngumauka? 5 Omwene womatanga ovakwaita osho ta ti: Taleni nawa, nhumbi tamu ende: 6 Nye omwa kuna mo shihapu, ndelenee mwa teya shinini. Nye mwa lya, ndelenee inamu kuta. Mwa nwa, ndelenee inamu kumwa. Nye mwa djala, ndelenee inamu dja outalala. Naau ta longele ondjabi te i tula mokandjato ka pombauka. 7 Omwene womatanga ovakwaita osho ta ti: Taleni nawa nhumbi tamu ende. 8 Indeni, londeni komhunda, mu ete omiti, nye mu tunge otembeli, opo nee handi ke i hokwa nefimano lange opo li holoke mo, Omwene osho ta ti. 9 Onye mwa teelela shihapu, ndelenee kwa dja shinini. Ndele nye mwe shi eta mo momaumbo eni, ndelenee Ame nde shi fudila po. Omolwashike? Omwene womatanga ovakwaita osho ta ti. Omolwongulu yange, osheshi ya kala ya ngumauka, fimbo keshe umwe womunye ta lotokele eumbo laye mwene. 10 Onghee hano eulu hali mu anyene omume, nedu oimeno yalo. 11 Ndele oshilongo neemhunda noilya nomaviinyu nomaadi naashishe eshi edu tali menifa novanhu noinamwenyo noilonga aishe yomake onde i ifanena oshikukuta.”
12 Osho Serubbabel yaSalatiel naJosua yaJosadak, omupristeli omukulunhu noshixupe ashishe shoshiwana osha uda ondaka yOmwene Kalunga kavo, neendjovo domuxunganeki Haggai, ngaashi Omwene Kalunga kavo e mu tuma ko. Noshiwana osha tila Omwene. 13 Opo nee Haggai, omutumwa wOmwene okwa popifa ovanhu omolweenghundana dOmwene, ndele ta ti: “Omwene ota ti: Ame ndi li pamwe nanye!” 14 Ndele Omwene okwa pendula omhepo yomuSerubbabel yaSalatiel omupangeli waJuda nomhepo yomuJosua yaJosadak omupristeli omukulunhu nomhepo yoshixupe ashishe shoshiwana. Opo nee ove uya nova hovela oshilonga shotembeli yOmwene womatanga ovakwaita, Kalunga kavo. 15 Va hovela mefiku etimilongo mbali netine lohani onhihamano yomudo omutivali wohamba Darius.
© Oshikwanyama Bible Revised © Bible Society of Namibia, 2008, 2012.
