Epangelo laAbia noita yaye
1 Momudo omutimulongo nomutihetatu wepangelo lohamba Jerobeam, Abia a ninga ohamba yaJuda. 2 Okwa pangela omido nhatu muJerusalem. Nedina laina la li Mikaia, omona omukainhu waUriel womuGibea. Ndele pa li oita pokati kaAbia naJerobeam. 3 Ndele Abia okwa hovela oita, a fikama nomatanga ovakwaita ovaladi omayovi omafele ane ovalumenhu ovanyasha. Ndele Jerobeam okwe mu tandela ombinga novalumenhu ovaladi omayovi omavele ahetatu. 4 Opo nee Abia a ya komhunda yaSemaraim yomeemhunda daEfraim, ndele ta ti: “Pwilikinei nge Jerobeam nOvaisraeli aveshe! 5 Mu shi shii nokutya, Omwene Kalunga kaIsrael a pa David epangelo lokupangela Ovaisraeli fiyo alushe, Ye e li pa David novana vaye ovalumenhu, la pama ngaashi ehangano lomongwa? 6 Ndelenee Jerobeam yaNebat, omupiya waSalomo yaDavid, okwa fikama, ndele ta twifa omwene waye eemhata. 7 Novalumenhu vehe nelipulo novakolokoshi va ongala puye ndele va dula Rehabeam yaSalomo. Ndele Rehabeam okwa li omunyasha e nomutima u noumbada, onghee hano a nyengwa okulipopila. 8 Ndele paife tamu diladila okutwa ondubo nepangelo lOmwene li li momake oludalo laDavid, shaashi nye ongudu inene ndele mu neenhana doshingoldo odo Jerobeam e mu ningila oikalunga. 9 Nye inamu taataa ovapristeli vOmwene, oludalo laAron, nOvalevi, ndele mwe likongela ovapristeli ngaashi oiwana yoikwailongo? Keshe ou e uya nongobe onona yomhedi needi heyali deemhedi a tambulwa, ye a ninga omupristeli woikalunga. 10 Ndelenee Kalunga ketu Oye Omwene, ndele inatu mu efa. Otu na ovapristeli, Ovaaron nOvalevi, ava tava longele Omwene. 11 Ndele vo ohava yambele Omwene omaxwikiloyambo ongula keshe nonguloshi keshe, noitwiminifo yedimba liwa, ndele hava kala noshisho shomingome detaliko dokoshitaafula shoshingoldoelela noshoshikwatelwalamba shoshingoldo neelamba dasho, opo di temwe onguloshi keshe. Osheshi fye hatu diinine eenghedimhango dOmwene Kalunga ketu, ndelenee nye mwe mu efa. 12 Ndele taleni, pamwe nafye, heeno, omupitili komesho yetu Oye Kalunga, novapristeli pamwe nomanghuma onghuwo oku mu shikila onghuwo. Ovana vaIsrael, inamu lwifa Omwene Kalunga kooxo, osheshi itamu ka kala nelao.”
13 Ndelenee Jerobeam okwa tula ovanhu mekulwila, konima yavenya; Osho ngaha vamwe va kala komesho yovalumenhu Ovajuda, ndele vakwao mekulwila konima yavo. 14 NOvajuda eshi va punguluka, olwoodi la li komesho yavo nokonima yavo. Ndele va kuwa kOmwene, fimbo ovapristeli va shika omanghuma. 15 Opo nee ovakwaita Ovajuda va yelula onghuwo yolwoodi. Novakwaita Ovajuda eshi va yelula onghuwo yolwoodi, Kalunga okwa taataa Jerobeam nOvaIsraeli aveshe komesho yaAbia nOvajuda. 16 Novana vaIsrael va ya onhapo Ovajuda, ndele Kalunga e va yandja momake avo. 17 Ndele Abia novakwaita vaye, va lwa olwoodi linene navo, onghee hano mOvaisraeli mwa dipawa ovalumenhu ovanyasha omayovi omafele atano. 18 Ndele mefimbo linya ovana vaIsrael va ninipikwa, ndelenee ovana vaJuda va mona eenghono, shaashi ve liameka kOmwene Kalunga kooxe. 19 Ndele Abia okwa shikula Jerobeam nokwa kufa oilando yaye: Betel naJesana naEfron nomikunda dayo. 20 Ndele Jerobeam ina mona vali eenghono pomafiku aAbia. NOmwene e mu denga fiyo a fya.
21 Ndelenee Abia okwa ehena komesho meenghono. Nokwe likongela ovalikadi omulongo navane, ndele a ninga xe yovana ovalumenhu omilongo mbali navavali noyoukadona omulongo navahamano. 22 Noinima imwe tai hepaulula Abia, eendjila daye neendjovo daye, oya shangelwa membo lomafatululo lomuxunganeki Iddo.
© Oshikwanyama Bible Revised © Bible Society of Namibia, 2008, 2012.
