Ahas ohamba yaJuda
1 Omido daAhas da li omilongo mbali ye eshi a ninga ohamba, nokwa pangela muJerusalem omido omulongo nanhano ndele ina ninga osho sha yuka momesho Omwene ngaashi xe David a ninga. 2 Ndelenee okwa enda neendjila deehamba daIsrael nokwa ningila Baal oitelekwafano. 3 Nokwa xwika omayambo mefilu laHinnom novana vaye e va xwika po nomundilo paixuna yoiwana ya tewa po kOmwene komesho yovana vaIsrael. 4 Nokwa yamba ndele ta twiminine oitwiminifo koikulundu nokomitune nopomuti keshe mutalala. 5 Onghee hano Omwene Kalunga kaye e mu yandja meke lohamba yaAram. Ndele vo ove mu ta ndele va kwata movakwaita vaye ongudu inene yeenghwate ndele ve va twala kuDamaskus. Ndele okwa yandjwa yo meke lohamba yaIsrael, ndele yo oye mu ta molwoodi linene. 6 Peka yaRemalja okwa dipaa muJuda mefiku limwe alike ovalumenhu ovaladi omayovi efele nomilongo mbali, shaashi vo ove liteeka Omwene, Kalunga kooxe. 7 Ndele Sikri, omuladi wokuEfraim, okwa dipaa Maasea, omona wohamba, naAsrikam, elenga leumbo lohamba, naElkana, ou a kala pohamba. 8 Novana vaIsrael va kwata ovamwaina vovakainhu novana ovamati noukadona ve fike pomayovi omafele avali ndele ve va twala eenghwate. Ndele va kufa kuvo oixuulwa ihapu ndele ve i twala kuSamaria.
9 Ndele oko kwa li omuxunganeki wOmwene, edina laye Oded. Nokwa ya okushakeneka omatanga ovakwaita ava ve uya kuSamaria, ndele ta ti kuvo: “Taleni, omolwoupyuhandu wOmwene, Kalunga kooxo eshi a handukila Juda, Ye okwe va yandja momake eni, ndele nye mwe va dipaa nehandu linene tali hange fiyo okeulu. 10 Ndele paife tamu diladila okuninga ovana vaJuda novaJerusalem ovapika veni ovalumenhu novakainhu. Kamu na nokuli mbela omanyonauno mahapu koshipala shOmwene Kalunga keni? 11 Pwilikinei nge paife, mu lekele eenghwate odo mwe di kufa kovamwaxo, va shune ko. Osheshi ehandu lOmwene li li kombada yeni!” 12 Opo nee ovalumenhu vamwe vomovakulunhu vovana vaEfraim va twa eemhata naava va dja koita nokutya, Asaria yaJohanan, Berekia yaMesillemot naJehiskia yaSallum naAmasa yaHadlai, 13 ndele tave va lombwele: “Inamu eta oku eenghwate, osheshi tamu tu velifa ombedi koshipala shOmwene. Osheshi okunyona kwetu okunene nehandu laye li li kombada yaIsrael.” 14 Ava va dililwa va efa hano eenghwate noixuulwa moipafi yovakulunhu noyoshiongalele ashishe. 15 Novalumenhu ava va tumbulwa pamadina avo va fikama ndele va tambula eenghwate ve di file oshisho, naaveshe ovo va li hamunghele mokati kavo va pewa oikutu yomoixuulwa. Ndele vo va pewa kuvo oikutu neenghaku ndele ve va pa okulya nokunwa ndele ve va vaeka ndele aveshe ava va loloka va londekwa keendongi ndele va twalwa kovamwaxe fiyo okuJeriko, oshilando shomilunga. Opo va shuna kuSamaria.
Ehandu lOmwene tali hange Ahas
16 Pefimbo tuu olo ohamba Ahas ya tuma keehamba daAsiria, do di i kwafe. 17 Osheshi nOvaedom yo ve uya ndele va ta Juda ndele va kufa eenghwate. 18 NOvafilisti va luwa oilando yomoshilongo shoumbangalanhu waJuda. Ndele va nangala Bet-Semes naAijalon naGederot naSoko naTimna naGimso nomikunda dado ndele tava tula mo. 19 Osheshi Omwene a ninipika Juda omolwaAhas, ohamba yaIsrael, shaashi a tandavelifa okuhadulika ndele a kala ina diinina Omwene. 20 Ndele Tiglat-Pileser, ohamba yaAsiria, oye mu homona ndele ye mu fininika, ndele inai mu kwafa. 21 Osheshi Ahas okwa tinha ongulu yOmwene nongulu yohamba neengulu dovakulunhu, ndele oinima e i tuma kohamba yaAsiria, nande inya inai mu kwafa sha.
22 Nomefimbo tuu olo, eshi va fininika unene ohamba Ahas, yo ya nyona unene kOmwene, 23 ye okwa yambela oikalunga yomuDamaskus, oyo ya li ye mu taataa, ndele ta ti: “Shaashi oikalunga yeehamba daAram ye di kwafa, naame yo ohandi i yambele, opo i kwafe nge!” Ndelenee oyo tuu oyo ye mu twala noya twala Israel ashishe menyonauko. 24 Ndele Ahas okwa ongela oinima aishe yomongulu yaKalunga, noinima yomongulu yaKalunga e i teyaula po nokwa vika oivelo yongulu yOmwene, nokwe litungila eealtari monhele keshe yomuJerusalem. 25 Nomoilando aishe yomuJuda yo okwa tunga oikulundu yokuyambela oikalunga yoilongo nosho a handukifa Omwene Kalunga kooxe.
26 Noinima imwe tai mu hepaulula noilonga yaye aishe, yotete noyaxuuninwa, tala, oya shangwa membo leehamba daJuda nodaIsrael. 27 Ndele Ahas okwa ka nangala pooxe nokwa pakwa moshilando muJerusalem, osheshi inave mu paka meembila deehamba daIsrael. Nomona waye Hiskia okwa ninga ohamba ponhele yaye.
© Oshikwanyama Bible Revised © Bible Society of Namibia, 2008, 2012.
