Omafindano aDavid nomalenga aye
1 Ndele konima yoinima ei David okwa ta Ovafilisti ndele e va tula koshi yepangelo laye. Ndele David okwa kufa oshilandopangelo momake Ovafilisti. 2 Ye okwa ta yo Ovamoab. Eenghwate okwe di nangeka momikweyo nhatu. Omikweyo mbali okwe di dipaa, naumwe okwe u xupifa. NOvamoab va ninga ovapiya vaDavid ndele ve mu yandjela oifendela. 3 David okwa taataa vali Hadadeser yaRehob, ohamba yaSoba, yo eshi ya ya i ka tandavelife epangelo layo fiyo okomulonga waEufrat. 4 Ndele David okwa kwata kuye eenghwate ovalondi veenghambe eyovi nomafele aheyali novakwaita vokolupadi omayovi omilongo mbali. David okwa teta omifipa deemhando deenghambe adishe dokomatemba, ndelenee a xupifa po eenghambe efele limwe dokomatemba. 5 NOvaarami vomuDamaskus ve uya okupopila Hadadeser, ohamba yaSoba. Ndelenee David okwa ta ovalumenhu omayovi omilongo mbali naavali vomOvaarami. 6 Ndele David okwa nangeka omatanga ovakwaita muAram shaDamaskus, onghee Ovaarami va ninga ovapangelwa vaye tava yandje oifendela. NOmwene okwa yandja kuDavid omafindano keshe apa a homona. 7 Ndele David okwa kufa oikelelifo yoshingoldo, oyo ya li hai longifwa kovapiya vaHadadeser, nokwe i twala kuJerusalem. 8 Ndelenee muBetah naBerotai, omoilando yaHadadeser, David okwa kufa oshikushu shihapu unene.
9 Tou, ohamba yaHamat, eshi a uda nokutya, David a taataa omatanga aeshe ovakwaita vaHadadeser, 10 okwa tuma omona waye omumati Joram kohamba David oku mu kunda noku mu halela elao, shaashi ye a lwa naHadadeser nokwe mu taataa, osheshi Hadadeser okwa li a homona alushe Tou. Ye okwe uya kuye noinima yoshingoldo noyoshisiliveli noyoshikushu. 11 Oyo David okwe i yapulila Omwene, pamwe noshisiliveli noshingoldo osho ye a kufa koiwana aishe e i tula mepangelo laye, 12 nokutya kOvaedom nokOvamoab nokovana vaAmmoni nokOvafilisti nokOvaamaleki nomoixuulwa yokuHadadeser yaRehob, ohamba yaSoba.
13 Ndele David okwa tumbalekifa edina laye, eshi a aluka ketaatao lOvaaramea nokwa taataa Ovaedom omayovi omulongo naahetatu mefilu lomongwa. 14 Ndele David okwa tula omatanga ovakwaita muEdom ashishe. NOvaedom aveshe va ninga ovapangelwa vaDavid. NOmwene okwa yandja kuDavid omafindano keshe apa a homona.
15 Ndele David okwa pangela Israel alishe, nokwa ningila oshiwana shaye ashishe osho sha yuka nosha wapala. 16 Ndele Joab yaSeruja okwa li ondjai yomatanga ovakwaita. Ndele Josafat yaAhilud okwa li elenga ekulunhu. 17 Ndele Sadok yaAhitub naAhimelek yaAbjatar ova li ovapristeli, ndele Seraja okwa li omushangi. 18 Ndele Benaja yaJehoiada okwa li omukulunhu wOvakereti nowOvapleti, novana ovamati vaDavid va li ovapristeli.
© Oshikwanyama Bible Revised © Bible Society of Namibia, 2008, 2012.
