Ounongo wokukalamwenyo
1 Ino endelelifa okanya koye, nomutima woye ino u endelelifa okupopya ondjovo koshipala shaKalunga. Osheshi Kalunga oku li meulu, ove ou li kombada yedu. Onghee hano eendjovo doye nadi kale dinini. 2 Ino endelelifa okanya koye okupopya, nomwenyo woye okuudaneka koshipala shaKalunga, shaashi Kalunga oku li meulu, ove ou li kombada yedu. Onghee eendjovo doye nadi kale dixupi. 3 Osheshi ngaashi ondjodi tai uya molwoisho ihapu, nosho yo okupopyaana kwelai molweendjovo dihapu. 4 Ove eshi wa udanekela Kalunga eudaneko, ou na oku li wanifa diva, osheshi Ye ita hokwa omalai. Wanifa osho we shi udaneka. 5 Shi dule ove iho udaneke sha, ponhele ho udaneke ndelenee ito wanifa. 6 Ino itavela okanya koye ka pefe olutu loye ombedi ndele ino tya moipafi yomutumwa waKalunga: “Nda puka!” Omolwashike ngeno Kalunga e nokuhandukila okupopya kwoye nokuhanauna po oshilonga shomake oye. 7 Osheshi eendjodi dihapu odongahoelela. Nosho yo omapopyaano mahapu. Ndelenee kala ho tila Kalunga! 8 Ngeenge to mono ohepele tai fininikwa neyukifo nouyuki tau lyatwa moshilongo, oshinima osho ino shi kuminwa; osheshi ou omunenenhu ota nangelwa komunenenhu mukwao, e mu dule, ndele aveshe vavali tava nangelwa kuvakwao ve va dule.
9 Ndelenee ekwafo linene loshilongo oleli: ohamba tai diinine oshilonga shomapya. 10 Ou e hole oimaliwa ita wanenwa koimaliwa. Ndele ou e hole oupuna, ita wanenwa keliko. Osho yo ongahoelela.
11 Emona eshi tali hapupala novali valo yo otava hapupala. Omunemona e nekwafo lashike hano kulo, omesho aye ashike tae li tale. 12 Eemhofi domulongi odo ditalala, nande ta li shinini ile shihapu; ndelenee oshipuna tashi nyengwa okukofa molwouyadipuna washo. 13 Nda mona koshi yetango oshiponga shidjuu: oupuna owo wa tuvikilila oshipuna omupya. 14 Oupuna ngeenge tau kanifwa po molwoshiponga, ndele e nomona omumati, ye ehe na sha vali. 15 Ngaashi ye a dile medimo laina, osho ta ka ya olutu longaho ngaashi e uya. Ndele ehe na sha osho shomoilonga a ka ye nasho. 16 Hano osho yo oshiponga shidjuu: naanaa ngaashi e uya e nokushuna ko. Hano okwa mona ekwafo lashike mokulipyakidila omhepo? 17 Nosho yo ha li mokukalamwenyo kwaye akushe momulaulu ndele e noluhodi lihapu. Navali okuhepekwa nehandu!
18 Tala, eshi yo nde shi mona osha wapala noshiwa: Okulya nokunwa nokushambukilwa ouwa moupyakadi aushe omunhu he u lipyakidile koshi yetango omafiku aye aeshe maxupi, Kalunga e mu pa. Osheshi osho oshipewa shaye. 19 Naashi yo oshali shaKalunga, Kalunga ngeenge ta pe omunhu oupuna nomamona ndele te mu itavelele okulya mo nokupewa oshipewa shaye nokulihafifa moilonga yaye idjuu. 20 Osheshi iha diladila unene omafiku omokukalamwenyo kwaye, shaashi Kalunga okwe mu itavelela ehafo lokomwenyo waye.
© Oshikwanyama Bible Revised © Bible Society of Namibia, 2008, 2012.
