Oudu waHiskia neimbiloshangwa molweveluko laye
1 Pomafiku enya Hiskia okwa hangika koudu mudjuu wokufya; nomuxunganeki Jesaja yaAmos okwe uya kuye, ndele te mu lombwele, ta ti: “Omwene ota ti: ‘Longekida eumbo loye, osheshi ito veluka vali.’ ” 2 Opo Hiskia a pungululila oshipala shaye kekuma, ndele ta ilikana Omwene, 3 ndele ta ti: “Akutu Omwene, dimbulukwa nhumbi nda kala nokweenda koshipala shoye moudiinini nomutima wange aushe, ndele nda longa, eshi sha wapalela omesho oye.” Ndele Hiskia okwa kwena unene. 4 Opo nee Jesaja okwa hangika vali kondjovo yOmwene tai ti: 5 Inda u ka lombwele Hiskia, u tye: “Omwene Kalunga kaxokulu David ota ti: Ame onda uda eilikano loye, nonda mona omahodi oye. Tala, ohandi weda ko komafiku oye omido omulongo nanhano. 6 Ndele nda hala ndi ku xupife noshilando eshi yo momake ohamba yaAsiria, ndele handi ka amena oshilando eshi.
7 “Nedidiliko wa pewa kOmwene eshi ta wanifa ondjovo ei yaye olo eli, 8 tala, Ame ohandi shunifa omudile wetango konima oule weenghatu omulongo, we di ehena komesho moshiulikifitundi shaAhas.” Ndele etango ola shuna oule weenghatu omulongo, olo la enda eenghatu odo.
9 Eimbiloshangwa laHiskia, ohamba yaJuda, eshi a li ta vele, ndele a veluka. 10 Ame nda tile: Opomawaneno omafiku ange ndi na okuya moivelo yoshovafi, omafiku okukala kwange aa a xupa ko, onde a nyekwa. 11 Ame nda tile: Omwene, itandi mono vali Omwene, medu lovanamwenyo; itandi ka mona vali ovanhu mokati koonakukala mounyuni. 12 Etwali lange otali ka kewa po, ndele tali ka kalekwa kokule naame, ngaashi etwali lomunahambo, okukalamwenyo kwange onde ku tonya ngaashi omutungifi woshiyata ta tonyo oshiyata shaye; ohandi tetwa ko koshitungifo shoshiti ngaashi oshiyata. Fimbo oufiku inau shikula omutenya, Ove to xulifa nge po. 13 Ame onde lidiinika fiyo ongula, ndele Ye ota teyaula omakipa ange, ngaashi onghoshi, fimbo oufiku inau shikule omutenya, Ove to xulifa nge po. 14 Ngaashi okahanameva nongaashi ewanye ohandi lili, nohandi kwena ngaashi onghuti; omesho ange a leda molwokutala keulu: Omwene, popile nge, osheshi ame ohandi fininikwa. 15 Ondi popye shike? Ye okwa popya, ndele okwe shi wanifa yo. Ame ohandi ka enda melimweneneno momido dange adishe molwouyehame womwenyo wange. 16 Omwene, oinima ya tya ngaha oyo omwenyo, ndele muyo mu nokukalamwenyo kwomhepo yange. Ove to velula nge; itavela ndi kale ndi na omwenyo. 17 Tala, oluhodi eli lidjuu ola ningila nge elao, Ove wa kala u hole omwenyo wange, Ove we u shila mo melambo lekano, osheshi Ove owa ekelashi omatimba ange aeshe konima yoye. 18 Osheshi oshovafi itashi ku pandula nefyo itali ku hambelele, oonakufya va kulukila mombila itave lineekele vali oshili yoye. 19 Ovanamwenyo, heeno, ovanamwenyo otave ku hambelele ngaashi ame nena, xe ota hepaululile ovana oshili yoye. 20 Omwene okwe lilongekida a xupife nge. Osho nee twa hala okushika ouxumbafeta vange momafiku okukala kwetu aeshe motembeli yOmwene. 21 Ndele Jesaja okwa lombwela va ete oshikamena sheengwiyu ndele shi natekwe pefina, opo li veluke. 22 Ndele Hiskia okwa tya: Edidiliko olilipipo, opo ndi ye motembeli yOmwene?
© Oshikwanyama Bible Revised © Bible Society of Namibia, 2008, 2012.
