Okulongela Kalunga kuhe nelidilululo, kaku noshilonga
1 Ondjovo yOmwene, ei ya hanga Jeremia, otai ti: 2 “Inda u ka kale ofika poshivelo shotembeli yOmwene, ove u ka udife ko ondjovo ei, u tye: Udeni ondjovo yOmwene, onye amushe vomuJuda, hamu uya mo moivelo ei okwiilikana Omwene.” 3 Omwene womatanga ovakwaita, Kalunga kaIsrael ota ti ngaha: Wapekeni eendjila deni noilonga yeni, opo nee Ame ohandi mu pe onhele okukala apa. 4 Inamu lineekela eendjovo doipupulu, eshi tava ti: Otembeli yOmwene, otembeli yOmwene, otembeli yOmwene oyo ei. 5 Ndelenee ngeenge tamu wapaleke eendjila deni neenghedi deni, nongeenge tamu kala nokudiinina etokolo liyuki mokukalafana kweni 6 novaendanandjila neefiye novafiyekadi itamu va hepeke nongaashi itamu tileshi ohonde ihe netimba ponhele ei noitamu shikula oikalunga yokoilongo, i mu twale moshiponga, 7 opo nee Ame ohandi mu itavelele okukala monhele ei, medu eli nde li pa ooxokulu fiyo alushe. 8 Ndelenee tala, nye hamu lineekele eendjovo doipupulu dihe nekwafo lasha. 9 Ongahelipi hano? Nye otamu vake nokudipaa nokuhaela nokwaana nokutwimina Baal nokufimaneka oikalunga yokoilongo muhe i shii, 10 ndele tamu uya ndele tamu holoka koshipala shange mongulu ei ya lukilwa edina lange, ndele tamu ti: Fye otwa mangululwa, opo tu wanife vali oixuna ei aishe. 11 Omwa tala ongulu ei ya lukilwa edina lange, oya ninga ekololo lovanyeki? Naame yo osho handi i tale, Omwene osho ta ti. 12 Indeni konhele yange ei ya li muSilo oko nda nangekele pehovelo edina lange, nye mu tale nhumbi nde i ninga omolwowii wovanhu vange Ovaisraeli. 13 Hano paife, osheshi mwa longa oilonga aishe ei, Omwene osho ta ti, nande nde mu popifa manga ku yela, nye inamu uda, ndele nande Ame nde mu ifana pombada, nye inamu itavela nge, 14 osho hano ongulu ei ya lulikwa edina lange, ndele tamu i lineekele, nonhele ei nde i mu pa, onye nooxokulu, nda hala ndi ninge ngaashi nda ninga Silo. 15 Ndele handi ke mu kandula po koshipala shange ngaashi nda kandula po ovakweni nepata alishe laEfraim.
16 Ndelenee oove, ino ilikanena ovanhu ava oku va tumbulila omaindilo, u fininike nge, osheshi Ame itandi ku udu. 17 Ove ku wete osho tave shi ningi moilando yaJuda nomomapandavanda aJerusalem? 18 Ovana ohava tyava oikuni, ooxe ohava tema omundilo, ovakainhu ohava pilula ondobo, va yofele ohamba yomukainhu yomeulu omingome, ndele hava yambele oikalunga oikunwayambo, va handukife nge. 19 Ndele vati, Ame, tava ningi nge nai, Omwene osho ta ti, havo vene tave lififa ohoni moipafi yavo? 20 Onghee hano Omwene Kalunga ota ti: “Tala, okuhanduka kwange noupyuhandu wange otau ka paukila onhele ei, kombada yovanhu noyoinamwenyo, kombada yomomiti domomapya nokombada yoiimati aishe yomoshilongo; otau xwama, ndelenee itau dimi.”
21 Omwene womatanga ovakwaita, Kalunga kaIsrael ota ti ngaha: Wedeni ko komaxwikiloyambo eni omatomenoyambo nye mu lye ombelela. 22 Osheshi Ame inandi lombwela ooxokulu, eshi nde va tembula muEgipiti ngaashi inandi va pa oshipango shexwikiloyambo ile etomenoyambo, 23 ndelenee onde va lombwela nda tya: Dulikeni kondaka yange, opo nee handi ka kala Kalunga keni, ndele nye otamu ka ninga ovanhu vange. Kaleni nokweenda shili nondjila ei handi i mu lombwele, opo mu kale nawa. 24 Ndelenee inava uda vo inava ameka omatwi avo kwaame, ndelenee ova enda pamhangela yavo vene nomoukukutu womitima davo dii; va pa nge ombuda, hashipala shavo. 25 Okudja kefiku olo ooxokulu va tembuka medu laEgipiti fiyo onena, onde mu tumina ovapiya vange aveshe ovaxunganeki, omafiku nomafiku, inandi fya ounye. 26 Ndelenee inava uda nge nongaashi inava ameka omatwi avo kwaame, vo ova li ve noshityani ve dule ooxekulu yavo owii. 27 Ove nge to va lombwele eendjovo odo adishe, vo itave ke ku uda. Ndele ove nge to va ifana mokule, ndelenee itava itavele; 28 opo nee va lombwela u tye: Oshiwana osho tuu eshi sha kala inashi dulika kondaka yaKalunga kavo, ndele inashi hala okulombwelwa. Oshili oya kana, itai udika momakanya avo.
29 Kulula ko eexwiki doye dokomutwe, Jerusalem, u di ekeleshi ove u ka lile eenghali keemhunda, osheshi Omwene okwa ekelashi nokwa kandula po epupi la hangika kehandu laye. 30 Osheshi ovana vaJuda ova ninga osho shii koshipala shange, Omwene osho ta ti. Ova tula oinima yoixuna mongulu yange ya lukilwa nge, ndele ve i nyateka. 31 Ndele molufilu laBen-Hinnom ova tungila mo Tofet eenduba dedu dokuyambela, opo va xwikile ko ovana ovamati noukadona, ndelenee Ame inandi shi va lombwela nongaashi inandi shi diladila nande. 32 Onghee taleni hano, omafiku otae uya, Omwene osho ta ti, itapa tumbulwa vali nande Tofet ile olufilu laBen-Hinnom, ndelenee otapa tiwa edipaelofilu, ndele muTofet omo tamu pakwa oimhu, osheshi kape nonhele pamwe. 33 Ndele oimhu yovanhu ava otai ningi yeedila dokeulu noyoifitukuti yedu; nokape nomunhu te i te po. 34 Ndele Ame ohandi xulike mo moilando yaJuda nomomapandavanda aJerusalem ondaka yekuwililo noyenyakuko, ondaka yomuhomboli nondaka yomuhombolwa, osheshi oshilongo eshi otashi ka ninga omakulukuma ongaho.
© Oshikwanyama Bible Revised © Bible Society of Namibia, 2008, 2012.
