Oupuna waJob nouyuki waye
1 Moshilongo shaUs mwa li mu nomulumenhu edina laye Job. Nomulumenhu ou kwa li ehe noshipo nomuyuki ta tila Kalunga ndele ta kukuma owii. 2 Nokwa dalelwa ovana vaheyali ovamati novana vatatu oukadona. 3 Nokwa li e noimuna eedi di fike pomayovi aheyali, neengamelo omayovi atatu neengobe deendjoko omafele atano, neendongi eenghadi omafele atano nongulu inene yovapika, onghee hano omulumenhu ou okwa li oshipuna e dule ovalumenhu aveshe vomoushilo.
4 Novana vaye ovalumenhu va li ve nonghedi okuteleka oitelekela meumbo lakeshe umwe mefiku lolufo laye. Opo nee va tuma ko ndele tava shivi ovamwaina vatatu ovakainhu va kale pamwe navo nokulya nokunwa. 5 Ndele omafiku oitelekela eshi a pita po, Job okwa tuma ko ndele te va yapula. Opo nee Job ta fikama ongula inene ndele ta yambe omaxwikiloyambo akeshe umwe womuvo. Osheshi Job a diladila: Ovamwange kashiimba va nyona ndele va sheka Kalunga momitima davo! Osho Job a ninga alushe.
Satana ta itavelelwa okushinda Job
6 Ndele efiku limwe ovana ovamati vaKalunga eshi ve uya ndele va kala ofika koshipala shOmwene, naSatana yo e uya pamwe navo. 7 Opo nee Omwene ta pula Satana: “Ove to di peni?” Ndele Satana ta nyamukula Omwene ndele ta ti: “Okokweendaenda kombada yedu nokweelaela.” 8 NOmwene ta pula Satana: “Ove wa didilika tuu omupiya wange Job? Osheshi kombada yedu kaku na nande umwe ngaashi ye: omulumenhu ehe noshipo, nomuyuki ndele ta tila Kalunga ndele ta kukuma owii.” 9 Ndele Satana ta nyamukula Omwene ndele ta ti: “U shii Job ota tila Kalunga ongaho? 10 Ove mwene, ndishi, we mu amena keembinga adishe neumbo laye naaishe e i kwete. Ove wa nangeka noupuna oilonga yomake aye noimuna yaye ya hapupala neenghono moshilongo. 11 Ndelenee nana eke loye u kume aishe e i kwete: ye ote ke ku liteeka shili moipafi yoye.” 12 Opo nee Omwene ta ti kuSatana: “Tala, aishe e i kwete, oi li meke loye. Ashike ye mwene ino mu kuma neke loye.” Ndele Satana okwa dja po koshipala shOmwene.
13 Ndele mefiku limwe ovana vaye ovalumenhu novakainhu va li tava li ndele tava nu omaviinyu meumbo loshiveli shavo, 14 omutumwa e uya kuJob ndele ta ti: “Fimbo eenhani da pulula neendongi tadi li opo pomunghulo wado, 15 Ovasaba va homona ndele ve di kwata, ndele va dipaa neongamukonda ovapiya. Aame andike nda xupa po ndi shi ku shiivifile.” 16 Fimbo ta popi, umwe okwe uya vali ndele ta ti: “Omundilo waKalunga wa wa keulu ndele wa xwika po eedi novapiya ndele we va lungwinifa po. Ndele aame andike nda xupa po ndi shi ku shiivifile.” 17 Fimbo ta popi, umwe okwe uya vali ndele ta ti: “Ovakaldea va li meengudu nhatu va tanda ombinga ndele va nhukila eengamelo ndele ve di kwata oixuulwa, ndelenee ovapiya ve va dipaa neongamukonda. Naame andike nda xupa po ndi shi ku shiivifile.” 18 Fimbo ta popi natango, umwe okwe uya vali ndele ta ti: “Ovana voye ovamati noukadona va li tava li ndele tava nu omaviinyu meumbo loshiveli shavo, 19 opo omhepo inene ye uya ya dja kombinga inya yombuwa ndele ya twa keekolonela nhee dongulu, ndele ya wila kombada yovanyasha ndele va fya. Naame nda xupa po ndi shi ku shiivifile.”
20 Opo nee Job a fikama, ta pombaula oshikutu shaye shokombada, a kulula eexwiki daye dokomutwe, nokwa wila poshi ta indile, 21 ndele ta ti: “Hamunghele nda dja medimo lameme, hamunghele ohandi ka shuna ko. Omwene okwa pele nge, nOmwene okwa kufa nge. Edina lOmwene nali hambelelwe!” 22 Pwaaishe oyo Job ina nyona sha ndele ina popya sha shokupa Kalunga oushima.
© Oshikwanyama Bible Revised © Bible Society of Namibia, 2008, 2012.
